8 Гб тезкор хотирага эга митти компьютер-брелок яратилди

АҚШнинг Аляска штатида жойлашган Q-Stick стартапи ўз синфида энг кучли компьютер деб аталган Q-Stick компьютер-брелогини тақдим қилди. Гаджетни ишлаб чиқариш учун пул тўплаш кампанияси Indiegogo сайтида ўтказилмоқда.

Қурилма турли операцион тизимларни, жумладан Windows, Linux ёки Android’ни юклай олади. Янги қурилма Blaze Plus ва Blaze Pro вариантларида сотувга чиқарилади.

Blaze Plus варианти Atom x7-Z8700 процессори билан жиҳозланади. Процессор 4 та 64 битли Airmont ядроларини, 8-авлоддаги Intel график процессорини ва 2 каналли хотира контроллёри LPDDR3’ни ўз ичига олади. Процессорнинг такт частотаси 1,6 ГГц ни ташкил қилади. 

Қурилманинг Blaze Pro варианти Atom x7-Z8750 процессорида ишлайди. Қурилма 128 Гб доимий хотирага эга, уни microSD карталари ёрдамида 256 Гбгача етказиш мумкин. Гаджетда алоқа учун Bluetooth 4.1 ва WiFi 802.11n/ac функциялари мавжуд. Графика учун Intel HD Graphics 405 чипи жавоб беради.

Гаджетнинг устунликлари сифатида унинг 7 сониядан камроқ вақт ичида ёқилиши, энергия тежовчи технологияси, HDMI 2.0 ёрдамидда 4K Ultra HD сифатдаги видеони узатиш имкониятини келтириш мумкин.

Гаджетнинг стандарт варианти Q-Stick Blaze Plus 130 доллар, Pro версияси эса 179 доллардан сотувга чиқарилади.