Apple ўз тарихида учраган илк муваффақиятсизлик 

1980 йил 19 майда Apple Computer Анаҳаймда (Калифорния штати) ўзининг янги Apple III компьютерини тақдим қилган. Бу қурилма компаниянинг тарихидаги илк муваффақиятсизлик бўлган. Компьютерни Apple II’нинг “давомчиси” ва бизнесга мўлжалланган шахсий компьютер сифатида яратиш режалаштирилган.

Эътиборлиси, бу қурилма яратилиши вақтида маркетинг мақсадлар ҳаммасидан устун бўлган илк компьютер бўлган. Стив Возняк Apple II’га бошчилик қилган ва ҳеч нарса қилиш керакмас, чунки унинг фикрича, мукаммал компьютер яратиб бўлинган. Apple III маркетинг бўлимига ва шахсан Стив Жобсга топширилган. У ўшанда компаниянинг илмий тадқиқотлар ва ишланмалар бўйича вице-президенти бўлган. Жобс янги компьютерга қатъий ўлчамлар ва шакл берган ҳамда уларга вентиляторлар ўрнатишни тақиқлаган. Иссиқлик ютиш масаласини эса оғир алюминий корпус ёрдамида ҳал қилишга тўғри келган.

Янги компьютер учун янги операцион тизим яратилган ва Apple II учун мўлжалланган дастурлар унга тушмаган. Бироқ аввалги модел ихлосмандларини йўқотмаслик мақсадида дастурларни эски усулда юклаш имконияти қолдирилган. Янги компьютер чиқиши катта реклама кампанияси билан борган, Apple II бўйича барча ишлар ёпилиб, барча кучлар янги лойиҳага ташланган. Бироқ афсуски, тез орада Apple III бутловчи қисмлари жуда зич жойлашгани ва сифатсиз улагичлар сабабли қизиб кетиши натижасида тез ишдан чиқиши аниқланган.

Компьютернинг муваффақиятсизликка учрашига яна бир сабаб, у учун сифатли дастурлар бўлмаган,  Apple II режимида эса қурилмани тўлақонли ишлатиб бўлмаган. Шу сабабли ташқи платалар уланиши блокланган. Компьютер, шубҳасиз, кейинчалик такомиллаштирилган, бироқ компания нуфузига путур етиб бўлган ва 1983 йилда IBM PC савдолар ҳажми бўйича 1-ўринга чиққан. Apple III эса 1984 йилдаёқ ишлаб чиқарилишдан олинган.