Улуғбек Қосимхўжаев Туризмни ривожлантириш давлат қўмитасини тарк этди

Туризмни ривожлантириш давлат қўмитаси раисининг биринчи ўринбосари вазифасини бажарувчи Улуғбек Қосимхўжаев бошқа ишга ўтгани муносабати билан вазифасидан озод қилинди. 29 январь куни Ўзбекистон президенти тегишли қарорни имзолаган.

У 2018 йилнинг августидан буён қўмитада масъул лавозимда ишлаб келаётганди.

1978 йилда Андижон вилоятида туғилган Улуғбек Қосимхўжаев 1997−2000 йилларда «Умид» президент жамғармаси йўналиши бўйича Пейс университетида (АҚШ) «Бизнесни бошқариш» мутахассислиги бўйича таҳсил олган. 2000−2002 йилларда Андижон вилояти ҳокимлигида ахборот-таҳлил гуруҳи етакчи мутахассиси, сўнгра 2002−2005 йилларда мутахассис, кейинчалик Вазирлар Маҳкамасида етакчи мутахассис бўлиб ишлаган.

2005−2007 йилларда Барри университетида (АҚШ) магистратурада «Молия» мутахассислиги бўйича таҳсил олган, 2007−2013 йилларда Барри ва Сундербирд (АҚШ) университетларида дарс берган. 2008−2013 йилларда Америкада меҳмонхоналар компанияси директори бўлган, 2013−2014 йилларда эса кўчмас мулк инвестиция компаниясида директор бўлиб ишлаган, 2014 йилда АҚШда ўз инвестиция компаниясини ташкил қилган.

Бундан аввалроқ, ҳукумат тузилмасида Ўзбекистон Республикаси бош вазирининг ўринбосари – Ўзбекистон Республикаси Туризмни ривожлантириш бўйича давлат қўмитаси раиси лавозими жорий этилиб, бу лавозимга Азиз Абдуҳакимов тайинланди. Бунгача Туризмни ривожлантириш қўмитасига Абдулазиз Оққулов раҳбарлик қилаётганди.