Коронавирусдан энг кўп зарар кўрган 10та туристик йўналиш номи маълум қилинди

Мальдив иқтисодиёти асосан туризмга боғлиқ бўлиб, бу ерда туризмнинг ЯИМдаги улуши 38,9 фоизга етади.

Мальдив / Фото: AP

Экспертлар коронавирус тарқалиши сабабли туризм оқими қисқариши оқибатида иқтисодиёти энг кўп зарар кўрган мамлакатларни аниқлашди, деб ёзади Иорданиянинг Al Bawaba портали.

Улар туризмнинг давлат ЯИМдаги улуши асосида рейтинг тузишди.

Маълум бўлишича, Мальдив иқтисодиёти асосан туризмга боғлиқ бўлиб, бу ерда туризмнинг ЯИМдаги улуши 38,9 фоизга етади.

Кариб денгизида жойлашган Британия Виргин ороллари туристлар учун 19 мартда ёпилганди. Бу ерда туризмнинг ЯИМдаги улуши 33 фоизни ташкил этади.

Макао бюджетининг 28 фоизи туризм ҳиссасига тўғри келади.

Голландиянинг Кариб денгизидаги Аруба оролида коронавирус билан боғлиқ 101та ҳолат қайд этилган. Бу ҳудуд ЯИМнинг 27,6 фоизини туризмдан олади.

Тинч океани жанубида жойлашган Вануату ороли 26 мартдан ўз чегараларини ёпганди. Бу ерда туризм ЯИМнинг 18,1 фоизини ташкил этади.

Атлантика океанидаги Кабо-Верде оролида туризмнинг ЯИМдаги улуши 17,7 фоизга тенг. Сент-Люсияда – 15,6 фоиз, Белизда – 15, Фижи ва Мальтада эса 14 фоизга етади.

#Туризм #пандемия

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.