Полиция «Барселона»нинг собиқ президентини қўлга олди

 «Барселона» футбол клубининг собиқ президенти Хосеп Бартомеу полиция томонидан қўлга олинди. Бу ҳақда Cadena SER нашри хабар бермоқда.

Нашрнинг маълумот беришича, Бартомеудан ташқари, «Барселона» ижрочи директори Оскар Грау ва юридик хизматлар бўйича масъул Роман Гомес Понти ҳам қўлга олинган.

Хабарда айтилишича, душанба куни Каталония полицияси клуб бош офисида тинтув ўтказган. ОАВ яна бошқалар ҳам қўлга олиниши мумкинлигини истисно этмаяпти.

Бартомеу ўзини танқид қилганлар тўғрисида туҳмат тарқатиш билан шуғулланган компания хизматидан фойдаланганликда гумон қилинмоқда. Полициянинг фикрича, ушбу компания билан ҳамкорлик қилишда молиявий ва юридик назоратнинг ички қоидалари бузилган. Клуб офисида тинтув давом этмоқда, полиция қоида бузилишини тасдиқловчи ҳужжатларни изламоқда, дейилади хабарда.