10 евродан 150 еврогача – Эрон виза тартиби ҳақида

UzbekLife дунё мамлакатлари виза тартиби ҳақида маълумот беришда давом этади. Мазкур мақолада Эрон Ислом Республикаси визасини олиш жараёни ҳақида батафсил тўхталамиз.

Эрон визасининг ўзига хос хусусиятлари

Эронга ташриф буюришни истаган сайёҳларнинг аксарияти элчихонадан ёки Эронга учиб келгач виза олишлари керак бўлади. Эрон ҳукумати туризмни кучайтириш мақсадида 60 дан ортиқ мамлакат фуқаролари учун визадан воз кечиш дастурини жорий этишни режалаштираётган бўлса-да, ҳали бу амалга оширилмади.

Эрон визасини олиш шакллари

Эронга киришни истаган ҳар ким (бир нечта давлатлар фуқаролари бундан мустасно) ўз мамлакатидаги Эрон элчихонаси ёки консуллигига мурожаат қилиб ёки Эронга келгач, аэропортда виза олиши зарур. Ўзбекистон Республикаси Эрон билан визасиз режим амал қиладиган давлатлар қаторига кирмаганлиги сабабли мамлакатимиз фуқаролари Эронга ташриф буюриш учун Эрон Ислом Республикасининг Ўзбекистондаги элчихонасига мурожаат қилишлари керак.

Эрондаги ҳомий ва таклиф хати

        Эрон визасига мурожаат қилиш учун Эронда сизга таклиф хати (Letter of Invitation) юборадиган ҳомий бўлиши керак. Таклиф хатини олганингиздан сўнг сиз уни керакли ҳужжатлар билан бирга мамлакатингиздаги Эрон элчихонаси ёки консуллигига топширишингиз мумкин.

Эрон визаси таклиф хати (Эрон виза коди)

Агар сиз Эронга сайёҳлик мақсадида ташриф буюраётган бўлсангиз, у ердаги сайёҳлик агентлиги ёки сизни кутиб оладиган дўстингиз, қариндошингиз билан боғланишингиз лозим. Агар иш юзасидан саёҳат қилаётган бўлсангиз, сиз ташриф буюраётган компания сизнинг таклиф хатингизни расмийлаштириши мумкин.

Ушбу жараён қуйидагича кечади: Эронда жойлашган сайёҳлик агентлиги, уй эгаси ёки компания Эрон Ташқи ишлар вазирлигига ариза юборади. Агар ТИВ аризани қабул қилса, улар сизга виза кодини юборишади. Сиз бу кодни Эрон элчихонаси ёки консуллигига бошқа барча керакли ҳужжатлар билан бирга топширасиз.

Эрон виза кодини олиш учун сиз ўзингиз ҳам Эрон ташқи ишлар вазирлигининг расмий веб-сайтида  ариза қолдиришингиз мумкин.

Ҳужжатларни элчихонага топшириш

Виза кодни олганингиздан сўнг уни бошқа керакли ҳужжатлар билан бирга Эрон элчихонаси ёки консуллигига топширишингиз керак. Элчихона/консуллик билан олдиндан боғланинг, шунда учрашувга боришингиз керакми ёки ҳужжатларни шунчаки ташлаб кетишингиз ҳам мумкинми, билиб оласиз. Баъзи элчихона/консулликлар сизга ҳужжатларни почта орқали топширишга рухсат беришлари ҳам мумкин.

Зарурий ҳужжатлар ва уларнинг талаблари

Эрон визаси учун ариза бериш жараёнини шу ерда бошлашингиз керак. Бунда сизга паспортингизнинг электрон (сканер қилинган) нусхаси, шунингдек, фотосурат (максимал 500 кБ) керак бўлади.

Фотосурат:

·       Тўртбурчак шаклида бўлиши зарур (камида 400 х 600 пиксел)

·       Юзингиз фотосуратнинг 70-80 фоизини эгаллаши керак.

Шундан кейинги ариза топшириш жараёни қуйидагича бўлади:

1.    Ушбу ариза формасидаги барча саволларга тўғри жавоб беринг.

2.    Аризани юборинг.

3.    Сиз электрон почтангизда тасдиқлаш кодини оласиз, уни тасдиқлаш саҳифасида ёзишингиз керак.

4.    Электрон почтангизни тасдиқлаганингиздан сўнг, штрих-код билан тасдиқлаш саҳифасини кўрасиз.

5.    Саҳифани чоп этинг (чоп этиш тугмаси мавжуд) ва кузатиш кодини ёзинг.

6.    Аризангизни кузатиш учун кузатиш кодидан фойдаланинг.

7.    Код чиқарилгандан сўнг ўз мамлакатингиздаги Эрон элчихонасига (керакли ҳужжатлар билан бирга) боришингиз керак, шунда сиз визангизни олишингиз мумкин.

Эътибор беринг, виза бўйича суҳбатдан ўтишингизга тўғри келиши мумкин.

Аэропортда виза тўлови еврода, нақд пулда амалга оширилади

Аэропортга етиб келганингиздан сўнг, барча ҳужжатларингиз билан бирга аэропортдаги Виза расмийлаштируви офисларидан бирига мурожаат қилишингиз керак. Виза тўлови еврода тўланиши керак. Шунингдек, тўлов карталар орқали эмас, балки фақат нақд пул шаклида қабул қилинади.

Эронга сафардан олдин турар жой ва саёҳатни суғурталаш тўғрисидаги ҳужжат мавжудлигига ишонч ҳосил қилинг.

Эслатма: Эронга ташриф буюраётган аёллар аэропортда тушганидан сўнг рўмол ўрашлари мақсадга мувофиқдир. Бундан ташқари, эркаклар ҳам узун енгли кўйлак, шим ёки пайпоқ кийишлари лозим.

Қайси виза турига топширсам бўлади?

Бу сизнинг Эронга ташриф мақсадингизга боғлиқ. Саёҳат мақсадидан келиб чиқиб мурожаат қилишингиз мумкин бўлган Эрон визалари турлари:

1)   Эронга сайёҳлик мақсадида кириш истагида бўлганлар учун Эрон туристик визаси. Талабгорнинг Эронда ҳомийси бўлиши керак, масалан, саёҳат агентлиги каби.

2)   Эроннинг муқаддас жойларидан бирида зиёрат қилишни истаган мусулмон хорижий фуқаролар учун Эрон зиёрат визаси.

3)   Эрон талаба визаси. Эронда таҳсил оладиган чет эллик талабалар ёки диний олимлар ва тадқиқотчилар учун. Номзодлар фан вазирлиги, таълим вазирлиги ёки аккредитациядан ўтган илмий муассасадан муҳожир бўлмаган талаба мақомини олиш ҳуқуқи тўғрисидаги гувоҳнома олишлари керак бўлади.

4)   Эронда ишлашни ният қилган чет эл фуқаролари, масалан, малакали ишчилар ва мутахассислар учун Эрон ишчи визаси. Номзодлар Эрондаги иш берувчисининг Меҳнат вазирлиги томонидан тасдиқланган меҳнат гувоҳномасига эга бўлиши зарур.

5)   Эрон транзит визаси. Саёҳатчилар, ҳайдовчилар ёки савдогарлар каби фақат Эрондан ўтадиган ва мамлакатда узоқ вақт қолиш ниятида бўлмаган саёҳатчиларга берилади. Саёҳатчилар ўзларининг охирги борадиган манзили учун визани ёки саёҳати давом этишини тасдиқловчи бошқа далилни тақдим этишлари керак бўлади.

6)   Чет эллик журналистлар ёки кинорежиссёрларга бериладиган Эрон медиа визаси. Номзодларга Медиа ва жамоатчилик дипломатияси (Media & Public Diplomacy) марказининг рухсатномаси керак.

7)   Эронлик аёлларга, шунингдек, уларнинг фарзандларига уйланган чет эллик эркакларга бериладиган Эрон никоҳ визаси.

8)   Эрон тиббий визаси. Даволаниш мақсадида Эронга киришни истаган чет эл фуқароларига берилади.

Эрон визаси талаблари қандай?

Эрон визасига мурожаат қилганингизда, сизга керак бўлган ҳужжатлар элчихонага ва виза турига боғлиқ бўлади. Бироқ, умумий топшириладиган ҳужжатлар ва уларнинг талаблари қуйидагича:

§ Сизнинг паспортингиз. Паспорт саёҳат қилмоқчи бўлган кундан бошлаб камида олти ой давомида амал қилиши керак.

§ Паспортингиз биринчи саҳифасининг электрон нусхаси (онлайн ариза ёки сайёҳлик агентлигига юбориш учун). Ушбу паспорт нусхасининг ўз талаблари мавжуд:

-         jpg ёки jpeg форматда;

-        10 кБ дан ортиқ ва 500 кБ дан кам;

-        Рангли;

-        Камида 800 х 600 пиксел;

-        Аниқ ва тушунарли бўлиши керак.

§ Ўзингизнинг расмингиз (электрон):

-        Сўнгги олти ой ичида олинган бўлиши;

-        Рангли бўлиши;

-        Оқ фонда бўлиши талаб қилинади.

Қўшимча: Ушбу суратда юзингиз тўлиқ кўриниши, олдинга қараб туришингиз керак. Аёллар рўмол кийишлари шарт. Диний мақсадлардан ташқари ҳеч қандай бош кийимга рухсат берилмайди. Бу ҳолатда ҳам у юзингизни тўсмаслигига амин бўлинг. Шунингдек, кўзойнак тақиш мумкин эмас.

§ Саёҳат йўналишингиз

§ Таржимаи ҳолингиз (резюме)

§ Саёҳат суғуртаси. 2011 йилдан бошлаб Эронга киришдан олдин саёҳатни суғурталаш мажбурийдир. Агар сиз уни олдиндан сотиб ололмаган бўлсангиз, уни аэропортда сотиб олишингиз керак бўлади.

§ Виза учун тўлов

§ Агар сиз почта орқали мурожаат қилган бўлсангиз: Ҳужжатларингизни қайтариш учун тўлови олдиндан қилинган ва манзил кўрсатилган конверт.

§ Қайтиш парвозингиз чиптаси. Қайтиш муддатингиз мамлакатга киргандан кейинги 30 кун ичида бўлиши керак.

§ Меҳмонхона буюртмаси

§ Агар сиз сайёҳлик агентлиги орқали мурожаат қилган бўлсангиз: Эрон сайёҳлик агентлигининг таклиф хати. Ушбу хат Эрон Ташқи ишлар вазирлигига келишингиздан камида икки кун олдин юборилган бўлиши керак.

Эрон визаси тўлови

Эрон визаси тўлови қуйидаги омилларга қараб ўзгаради:

-        Виза олишда сизга ёрдам берадиган сайёҳлик агентлиги;

-        Виза учун ариза топширган Эрон элчихонаси ёки консуллиги;

-        Эронга келиш учун виза тўлови сизнинг миллатингизга қараб ҳам ўзгариши мумкин.

Аксарият Европа мамлакатлари учун аэропортга келгач виза олиш тўлови 75 еврони ташкил қилади.

Эрон визасини узайтириш мумкинми?

Ҳа. Агар сиз Эрон визасини олдиндан ёки мамлакатга келгач олган бўлсангиз, уни Эроннинг йирик шаҳарларидаги Чет элликлар билан ишлаш бўйича полиция бўлимида узайтиришингиз мумкин. Жараён одатда атиги

1 кун давом этади.

Визангизни узайтириш сизнинг дастлабки виза муддатингизга асосланади: агар сизда 30 кунлик виза бўлса, уни қўшимча 30 кунга узайтиришингиз мумкин. Агар сизда 15 кунлик виза бўлган бўлса, унда сиз уни яна 15 кунга узайтира оласиз ва ҳоказо.

Давлатбек Асадов

UzbekLife  колумнисти