Термиз муҳандислик-технология институтига ректор тайинланди

Вазирлар Маҳкамасининг 2022 йил 29 апрелдаги 227-сонли қарори билан Ўрол Чориевич Аҳмедов Термиз муҳандислик-технология институтининг ректори этиб тайинланган.

Президентнинг 2021 йил 3 декабрда имзолаган қарори билан Тошкент давлат техника университети Термиз филиали негизида Термиз муҳандислик-технология институти ташкил этилганди.

Қарорга кўра, институтнинг асосий фаолият йўналишларидан бири замонавий технологиялар бўйича чуқур билимга эга мутахассисларни тайёрлаш, қайта тайёрлаш ва уларнинг малакасини ошириш саналади.

Институт давлат олий таълим муассасаси ҳисобланиб, Тошкент давлат техника университети Термиз филиали талабалари таҳсил олаётган бакалавриат таълим йўналишлари ва магистратура мутахассисликлари бўйича институтда ўқишни давом эттиради.

Институт, жумладан:

• халқаро рейтингда биринчи 1 000 таликка кирган хорижий ОТМнинг дастури асосида ўз таълим дастурларини шакллантиради;
• иш берувчилар талабларидан келиб чиқиб ўқув режаларидаги назарий таълим улушини қисқартириш ҳисобига амалий машғулотлар ҳажми оширилади;
• институт фаолияти йўналишлари бўйича маслаҳат ва эксперт-таҳлилий хизматларни самарали амалга ошириш учун илмий-тадқиқот ва инновацион хизмат кўрсатувчи корхоналарни ташкил этади.

Қайд этилишича, институтнинг илмий салоҳиятини ошириш мақсадида 2022/2023 ўқув йилидан етакчи ОТМда тегишли магистратура мутахассисликлари ва 2023 йилдан таянч докторантурада кадрларни мақсадли тайёрлаш чоралари кўрилади.