Украинага йирик ракета ҳужуми Россияга 700-900 миллион долларга тушди - Forbes

15 ноябр куни Украина ҳудудини оммавий ўққа тутиш пайтида Россия 90 та ракетани учириш учун 700-900 миллион доллар сарфлади.

Фото: rbc.ua

Украина Ҳарбий ҳаво кучлари ракеталарнинг аниқ сони ва турларига аниқлик киритмади. Бироқ, маълумки, битта Х-101 ракетасининг тахминий нархи 13 млн доллар, «Калибр» - 6,5 млн доллар, Х-555 - 4 млн доллар туради, деб ёзди Forbes. Сўнгги зарбалар Ту-95 ва Ту-160 самолётлари орқали Х-101 ва Х-555 ракеталари билан амалга оширилган.

10 октябр куни Украина ҳудудига қилинган дастлабки йирик ракета ҳужуми Россия Федерациясига 400-700 миллион долларга тушган эди. Шу вақтда Россия 84 та қанотли ракета ва 24 та дронни учирди.

Ундан олдин энг оммавий зарбалардан бири 25-26 июн кунлари содир бўлди, ўшанда Россия ва Беларусдан умумий қиймати 150-220 миллион долларгача бўлган 60 дан 80 тагача узоқ масофали ракеталар учирилди.

15 ноябр куни тушдан кейин Россия Украинага йирик ракета ҳужумини бошлади: 70 га яқин қанотли Х-101/Х-555, 20 га яқин денгиз «Калибри» ва 10 та камикадзе дронлари учирилди. Аввалги зарбалар сингари, кўплаб ракеталар турар жой биноларига тегди. Украина ҳаво мудофааси ракеталарнинг 73 тасини уриб туширишга муваффақ бўлди.

#ракета зарбалари #Украина #Россия