Исроил армияси ҲАМАС билан Ғазо марказида жанг олиб бораётганини маълум қилди

Шунингдек, ҲАМАС етакчиси Яҳё Синвар яшрингани тахмин қилинаётган бункер ҳудуди қуршаб олингани айтилмоқда.

Фото: Reuters

Исроил ҳарбийлари Ғазо шаҳри марказида Фаластиннинг ҲАМАС ҳаракатига қарши курашмоқда. Бу ҳақда Исроил мудофаа кучлари (ЦАҲАЛ) жанубий қўмондонлиги раҳбари, генерал-майор Ярон Финкелман хабар берди.

«Биз ҳозир Ғазо секторининг йирик марказларида жанг қиляпмиз. Мен у ердан ҳозиргина қайтдим. Исроил мудофаа кучлари сўнгги ўн йил ичида биринчи марта Ғазо шаҳри марказида жанг қилмоқда. Террор юрагида», деди Финкелман.

ЦАҲАЛ вакилининг таъкидлашича, Исроил армиясининг қуруқликдаги операциясидан мақсад ҲАМАС ҳаракати етакчилари ва амалдорларини, шунингдек, ҳарбий инфратузилмани тўлиқ йўқ қилишдир. Бундан ташқари, гаровга олинганларни озод этиш.

Шу билан бирга, Исроил мудофаа кучлари Ғазо секторидаги ҲАМАС етакчиси Яҳё Синвар яшрингани тахмин қилинаётган бункер ҳудудини ўраб олишга муваффақ бўлгани айтилмоқда.

Бу ҳақда Исроил мудофаа вазири Йоав Галлантга таяниб The Times of Israel хабар берди.

Мудофаа вазирлиги раҳбари сўзларига кўра, Синвар «ўз бункерида яширинган ва шериклари билан алоқа қилмаяпти». Шунингдек, Исроил ҳарбийлари ҳозирда Ғазо шаҳри «юрагида» жанг қилмоқда. У, шунингдек, ҳарбийлар Синварни йўқ қилишига ваъда берди.

#Исроил #Ҳамас #Ғазо

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.