Ўзбекистон ва Италия ҳудудлараро ҳамкорликни кенгайтириш масаласини кўриб чиқяпти

Ўзбекистон ТИВ раҳбарининг ўринбосари Италия элчиси билан учрашди.

Фото: Ташқи ишлар вазирлиги матбуот хизмати

Ўзбекистон ташқи ишлар вазирининг ўринбосари Музаффар Мадраҳимов Италия элчиси Агостино Пинна билан учрашди.

ТИВ маълумотига кўра, Ўзбекистон ва Италия ўртасидаги стратегик шериклик ва кўп қиррали ҳамкорлик муносабатларини ўзаро манфаатли йўналишларда янада мустаҳкамлаш юзасидан фикр алмашилди. Олий даражадаги музокаралар доирасида эришилган барча келишувларни амалга оширилиш жараёнига алоҳида эътибор қаратилди.

Иқтисодий дипломатияни фаол илгари суриш, ҳудудлараро ҳамкорликни кенгайтириш, парламентлараро мулоқотни ривожлантириш, кўп томонлама тузилмалар доирасидаги муносабатларни фаоллаштириш бўйича қўшма чора-тадбирлар муҳокама қилинди.

Томонлар турли даража ва шакллардаги қўшма тадбирларни ташкил этиш бўйича таклифларни ҳам кўриб чиқди.

#Италия #Музаффар Мадраҳимов