FT: ЕК Киевга ёрдамни келишиб олиш учун Венгрияга ёнбосишга тайёр

Еврокомиссия Венгриянинг Украинага 50 миллиард евро миқдорида макромолиявий ёрдам пакетини қабул қилиш учун бир қанча талабларини бажаришга тайёр. Бу ҳақда 11 январ куни Financial Times нашри номи ошкор этилмаган европалик юқори мартабали амалдорларга таяниб хабар берди.

2023 йил декабр ойида Венгрия бош вазири Виктор Орбан Украинага макромолиявий ёрдам пакетига вето қўйди. Ўшандан бери Брюссел бу блокадани олиб ташлаш йўлини топишга ҳаракат қилмоқда. Вариантлардан бири - Будапештга 2025 йилда Украинага макроиқтисодий ёрдам пакетидан тўловларни «ярим йўлда» тўхтатиш имкониятини беришдир, деди FT’га мунозаралардан хабардор уч манба. 

2025 йилда Украинага тўловларни янги баҳолашдан ўтказиш имконияти 

Европа Иттифоқи келаси йили Украинага маблағ ажратиш масаласини қайта кўриб чиқишга тайёр. Шу билан бирга, Киев ҳали ҳам бу ёрдамга муҳтожми ёки йўқми ва уни олиш шартларини бажаряптими, деган баҳо берилади. Бу Венгрияга тўловларни давом эттиришга вето қўйиш имконини яратади, дея хабар берди нашр. «Комиссия, шунингдек, ёрдамнинг йиллик аудитини ўтказишга ва «фавқулодда тормоз» қоидасини киритишга тайёр, унга кўра, ҳар қандай давлат Украинага тўловлар бўйича жиддий хавотирларни ЕИ саммитида муҳокама қилиши мумкин. Бироқ, бу Венгрияга молиялаштиришга вето қўйиш учун қўшимча имконият бермайди», дейилади мақолада. 

Бу имтиёзлар Виктор Орбанга ветосини олиб ташлаш учун етарли бўладими, деган саволга Венгриянинг юқори мартабали амалдори шундай жавоб берди: «Биз ҳозирча аниқ айта олмаймиз, лекин менимча, шундай бўлади».

Низомларни қайта кўриб чиқиш ғояси биринчи марта октябр ойида Венгрия томонидан таклиф қилинган, бироқ бошқа Европа Иттифоқи раҳбарлари бу ҳаракатга қарши чиққан, чунки бу Украинани молиявий қўллаб-қувватлаш бўйича ишончдан маҳрум қилади, деб эслатади FT.

«Киев харажатларни молиялаштириш учун пул чиқариш заруратидан қочиш мақсадида Европа Иттифоқи маблағлари Украинага март ойидан кечикмай етиб келиши лозимлигини таъкидламоқда», - дея таъкидлайди журналистлар.