Фин фирмалари РФга ҳарбий-саноат комплекси учун ускуналар етказиб беряпти

Финландиянинг Yle жамоат телеканали маълумотларига кўра, 20 дан ортиқ фин компанияси Россияга ҳарбий-саноат мажмуасида фойдаланишга яроқли техника ва ускуналар етказиб беряпти. 15 январ, душанба куни Yle нашри ўз ихтиёридаги божхона маълумотларига таяниб хабар беришича, Россиядан кўчиб келган шахсларга тегишли кичик логистика ва экспедиторлик фирмалари РФга юқори технологиялар ва бошқа маҳсулотларни экспорт қилмоқда, улар Украинага ҳужумни давом эттириш зарур. 

Бошқа нарсалар қаторида, гап халқаро санкциялар билан тақиқланган тоифалар – электрон датчиклар, частота синтезаторлари, дизел двигателлари, трансмиссия қисмлари, ёнилғи насослари, оптик қурилмалар, волтметрлар, подшипниклар деталлари, видеокамералар клапанлари, электрон платалар ва қаттиқ дискларни экспорт қилиш ҳақида бормоқда.

Суриштирувда Лаппеенранта яқинидаги фирма томонидан РФга сенсорлар, дизел двигателлари, ёнилғи насослари ва трансмиссия ускуналари экспортига ишора қилинади. Шунга ўхшаш компонентлар Украинада йўқ қилинган Россия қуроллари ва транспорт воситаларида топилган, деб ёзади Yle. 

РФ билан чегарада ва Вантаада кўзга кўринмас офислар 

Телеканал сайтида таъкидланишича, бу компаниялар Финландия жануби-шарқида РФ билан чегарага яқин ҳамда пойтахт аэропорти ва йирик логистика марказлари жойлашган Вантаа шаҳрида «кўзга ташланмайдиган ангарлар ва кичик офисларда» жойлашган. Улар товарларни тўғридан тўғри РФга экспорт қилган ёки хорижий етказиб берувчилар ва россиялик харидорлар ўртасида воситачи бўлган. Уларнинг мижозлари Россия ҳарбий-саноат комплекси ва разведка идоралари, жумладан, Федерал разведка хизмати («ФСБ») билан алоқадор, дея таъкидланади маълумотда. 

РФнинг Украинага қарши кенг кўламли уруши бошланганидан кейин ушбу компанияларнинг савдоси сезиларли даражада ошди. Тадқиқотда фирмалар номи ва улар эгаларининг исми тилга олинмаган. Журналистлар билан интервюга рози бўлган компаниялар санкцияларни бузганини рад этди, Yle’нинг баъзи суҳбатдошлари эса мижозларни текшириш имкони йўқлиги ва кенг кўламли санкцияларга риоя қилиш қийин эканини таъкидлади. Ушбу компанияларнинг камида тўрттаси жиноий тергов остида. 

Финландия Россияга 3,5 мингта УУА етказиб берилганини текширмоқда 

Айни пайтда, 2023 йил декабр ойи бошида Финландия божхоначилари РФга 3,5 мингга яқин учувчисиз учоқлар ва ЕИ санкциялари билан тақиқланган бошқа товарлар ноқонуний етказиб берилишини аниқлагани маълум бўлди. Финландиянинг иккита компанияси Россия ҳудудидан транзит орқали учинчи мамлакатларга маҳсулот етказиб бериш бўйича экспорт операцияларини расмийлаштирган, бироқ якунда юк Россияда қолиб кетган, деб хабар қилди божхона идораси. Юк таркибида турли хил электроника, микроконтроллерлар, яримўтказгич компонентлари ва «мудофаага алоқадор дея таснифланган» бошқа жиҳозлар мавжуд эди. Финландия Нидерландия, Британия, АҚШ ва Европол билан ҳамкорликда тергов олиб бормоқда. 

Россиянинг Украинага қарши кенг кўламли уруши бошланганидан бери ЕИ РФга қарши 10 дан ортиқ санкциялар пакетини қабул қилиб, бир қатор товарларни етказиб беришни тақиқлади. Чекловчи чора-тадбирларнинг 11-пакетига мувофиқ, Брюссел Россияга қарши чекловларни четлаб ўтишга ёрдам берадиган ҳамда Европадан бўлмаган компанияларга қарши иккиламчи санкцияларни қўллаш ва Европа товарларини Россияга олиб боришга рухсат берган учинчи давлатлар билан савдони чеклаш ҳуқуқига эга.