Чанишева Путин номига афв этишини сўраб ариза ёзди

Алексей Навалнийнинг Уфадаги штаби собиқ координатори Лилия Чанишева Россия президенти Владимир Путин номига афв этишини сўраб ариза ёзди. RT канали бу ҳақда 13 май, душанба куни биринчи бўлиб хабар берди, бу маълумотни Чанишевага яқин бўлган «Новая газета. Европа» манбаси тасдиқлади.

RT Навалний тарафдорининг Путинга қилган мурожаати тўлиқ версиясини эълон қилди. Унда Чанишева 2021 йилда Россия Федерациясида фаолияти тақиқланган Коррупцияга қарши курашиш жамғармаси («ФБК») раҳбариятидан кетгани ва шундан бери ижтимоий-сиёсий фаолият билан шуғулланишни тўхтатганини ёзади. Шунингдек, у 400 минг рубл миқдоридаги жаримани тўлаганини, 9,5 йиллик қамоқ жазосидан 3,5 йилни ўтаб бўлганини таъкидлади ва Путиндан уни жазодан озод қилишни сўради.

Чанишева ўз қўли билан ёзган аризасида у сурункали касалликлардан азият чекаётган ва ўзларига етарли даражада ёрдам бера олмайдиган ота-онасига кераклигини таъкидлади. Канал ёзишича, Чанишеванинг ота-онаси «унинг қарорини ижобий баҳолаган». «Новая газета. Европа» суҳбатдошига кўра, у илгари адвокати Рамил Гизатуллин билан афв этиш тўғрисида ариза ёзишни муҳокама қилган. 

Лилия Чанишеванинг иши 

2017-2021 йилларда Алексей Навалнийнинг Уфа штабини бошқарган Чанишева 2021 йилнинг кузида Навалний ва унинг шерикларига қарши қўзғатилган «экстремистик» жамоа тузиш бўйича жиноий ишда биринчи бўлиб ушланган эди. У 2021 йил ноябр ойида ҳибсга олинган ва Россия Федерацияси Жиноят кодексининг учта моддаси билан айбланган. 

2023 йил июн ойида Лилия Чанишева Уфанинг Киров туман суди томонидан «экстремистик ҳамжамият яратиш», «экстремизмга даъват қилиш», шунингдек, «шахс ва фуқароларнинг эркинликларига тажовуз қилувчи ННТ тузиш» айбловлари билан 7,5 йилга озодликдан маҳрум этилган эди. Прокурор Чанишевани 12 йилга озодликдан маҳрум қилишни сўради. 

Чанишева ўзига қарши жиноий ишни сиёсий деб атаган

Ёпиқ суд мажлисида сўнгги сўз билан чиқиш қилган Чанишева ўзининг жиноий ишини сиёсий деб атади ҳамда уни Россия президенти Владимир Путин ва Бошқирдистон раҳбари Радий Хабиров томонидан таъқиб қилиниши билан боғлади. «Улар узоқ вақтдан бери ҳар қандай норозиликни йўқ қилишни, одамлар ва ҳукумат ўртасида душманлик муҳитини яратмоқчи бўлганидан ягона мақсад - 2024 йилда ҳокимиятни сақлаб қолиш. Лекин улар - коррупция, паст маош ва пенсиялар, пасайиб бораётган иқтисодиёт ва кўтарилган нархлар. Улар - уруш», деди у. 

2024 йил апрел ойи бошида Бошқирдистон Олий суди «экстремистик» фаолиятда айбланаётган Алексей Навалнийнинг Уфадаги штаби собиқ раҳбари Лилия Чанишевага нисбатан жазони кучайтирди. 9 апрел куни Коррупцияга қарши курашиш жамғармаси («ФБК») директори Иван Ждановнинг маълум қилишича, умумий режимдаги колониядаги жазо муддати етти ярим йилдан тўққиз ярим йилгача оширилган. Иш бўйича иккинчи айбланувчи, уфалик фаол Рустем Мулюковга нисбатан чиқарилган ҳукм ўзгаришсиз қолдирилди – икки ярим йиллик қамоқ жазоси.