Германия разведка хизмати раҳбари РФдан келаётган ҳарбий хавфга ишора қилди

Федерал разведка хизмати (BND) раҳбари Бруно Кал Россиядан келаётган эҳтимолий ҳарбий таҳдидга ишора қилди. 14 октябр, душанба куни у Германия Бундестагининг разведка хизматлари фаолиятини мониторинг қилиш қўмитаси олдида сўзлаган нутқида: «Энг камида шу ўн йилликнинг охирида Россия қуролли кучлари НАТОга ҳужум қила олади», деди.

Калнинг сўзларига кўра, «Кремл Германия Федератив Республикасини душман деб билади». «Биз Россия билан тўғридан тўғри зиддиятдамиз», — дея таъкидлади у ва Германия Россиянинг тажовузидан ўзини ҳимоя қилиш учун Украинага кўрсатаётган ёрдам миқдори бўйича дунёда АҚШдан кейин иккинчи ўринда эканлигини таъкидлади. Германия разведка хизмати раҳбари нуқтайи назарига кўра, Россия президенти Владимир Путин учун гап нафақат Украина , балки «аслида янги дунё тартибини яратиш ҳақида кетяпти».

Германияда Россия махсус хизматлари фаоллиги ошгани қайд этилди

Германия расмийлари, 14 октябр куни Handelsblatt ишбилармонлик газетасида чоп этилган Германия Ички ишлар вазирлиги раҳбари Ненси Фезернинг интервюсига кўра, Россия разведка хизматлари фаоллиги ошганини қайд этмоқда. «Биз Путин режимининг тобора тажовузкор бўлиб бораётганини кўрмоқдамиз», деди у бу борада. Кейинроқ суҳбатда вазир Россия разведка хизматлари бир қатор рус агентларининг мамлакатдан чиқариб юборилиши туфайли Германияда заифлашганини таъкидлади.

Фезернинг сўзларига кўра, немис хавфсизлик хизматлари «мамлакатни (Германия) Россия жосуслиги таҳдиди, қўпорувчилик ҳаракатлари ва киберҳужумлардан ҳимоя қилиш учун ақл-бовар қилмайдиган ресурслардан фойдаланмоқда». Шу тариқа, бир неча ой олдин Германия Ички ишлар вазирлиги Москва кўрсатмаси бўйича тайёрланаётган портловчи моддалар ёрдамида мамлакатда ҳужумлар содир этилишининг олдини олган. Бу ҳужумлардан мақсад Германиянинг Украинага ҳарбий ёрдам кўрсатишига йўл қўймаслик эди, дея аниқлик киритди Handelsblatt суҳбатдоши.

Интервю Германия парламенти – Бундестагнинг Германия махсус хизматлари раҳбарлари иштирокидаги ялпи мажлиси аввалида эълон қилинди.