Turk xakerlari Rossiyaning Isroildagi elchixonasi saytiga Otaturk suratini joylashtirishdi

Börteçine Siber Tim turk xakerlari guruhi Facebook orqali Rossiyaning Isroildagi elchixonasi saytini buzib kirishganini e'lon qilishdi. Moskva vaqti bilan soat 15:00 da (Toshkent vaqti bilan 17:00 da) elchixonaning saytiga kirib bo‘lmayotgani ta'kidlanayotgandi, biroq saytning Google keshida qolgan versiyasiga ko‘ra, saytda Turkiya bayrog‘i va mamlakatning birinchi prezidenti Mustafo Kamol Otaturkning surati joylashtirib qo‘yilgan.

3 yanvarga o‘tar kechasi ushbu guruh Rossiya aloqa va ommaviy kommunikatsiyalar vaziri Nikolay Nikiforovning Instagram-akkauntini buzib kirgandi.

O‘shanda Nikiforovning Instagram’dagi sahifasida ushbu hujumni Börteçine Siber Tim xakerlik guruhi amalga oshirgani haqidagi xabar va 6 ta surat: bosmachilik harakati boshlig‘i Anvar-Posha, Turk Respublikasi asoschisi Kamol Otaturk, Turkiya tomonidan urib tushirilgan Rossiya harbiy samolyotining qulashi payti, urib tushirilgan samolyotning o‘zi va ikkita turk bayrog‘i suratlari joylashtirilgandi.