O‘zbekiston oltin-valyuta zaxiralari to‘g‘risidagi ma'lumot e'lon qilindi

Foto: Getty Images

O‘zbekiston Respublikasi Markaziy banki respublika oltin-valyuta zaxiralari to‘g‘risidagi ma'lumotni e'lon qildi.

Qayd etilishicha, oltin-valyuta zaxiralarini hisoblash metodikasi Xalqaro valyuta jamg‘armasining standartlari asosida yuritiladi. Oltin-valyuta zaxiralarining tarkibi xorijiy valyuta aktivlari va quyma shaklidagi monetar oltindan iborat.

Oltin-valyuta zaxiralarini samarali boshqarish maqsadida Markaziy bank tomonidan zaxiralarning yalpi va sof qiymatlari hisobi yuritiladi.

Sof oltin-valyuta zaxiralari tijorat banklari va davlat boshqaruvi organlarining (Moliya vazirligi, Tiklanish va taraqqiyot jamg‘armasi bundan mustasno) Markaziy bankda ochilgan hisobvaraqlaridagi valyuta mablag‘larini, ya'ni Markaziy bankning ushbu tashkilotlar oldidagi majburiyatlarini hisobga olmaydi.

O‘zbekiston Respublikasining oltin-valyuta zaxiralari
mln.AQSh dollarida

Ko‘rsatkichlar	01.01.2018	01.04.2018	01.07.2018	01.10.2018	01.11.2018
I. Yalpi oltin-valyuta zaxiralari	28 076,9	28 494,0	27 660,5	26 407,3	26 494,1
1. Xorijiy valyutadagi aktivlar	14 042,8	14 517,2	13 818,3	12 454,4	11 846,1
2. Monetar oltin	14 034,1	13 976,8	13 842,2	13 953,0	14 648,0
II. Sof oltin-valyuta zaxiralari	26 567,5	27 086,7	26 648,9	25 494,5	25 716,4

Bildirilishicha, joriy yilning yanvar-oktabr oylarida oltin-valyuta zaxiralarining kamayishi qisman oltin narxining 1296,50 dan 1217,70 doll/tr.untsiyaga pasayishi hisobiga yuzaga keldi. (narxning oltin-valyuta zaxiralarining kamayishga ta'siri - 853,0 mln.doll).

Joriy yilning oktabr oyida oltin-valyuta zaxiralarining ko‘payishi qisman oltin narxining 1183,50 dan 1217,70 doll/tr.untsiyaga o‘sishi hisobiga yuzaga keldi. (narxning oltin-valyuta zaxiralarining ko‘payishiga ta'siri - 403,2 mln.doll).

Eslatib o‘tamiz, avvalroq O‘zbekistonda ayrim ma'lumotlarni rasman chop etish bo‘yicha cheklovlar olib tashlanishi xabar berilgandi.

#valuta #zaxira #oltin