«O‘zdavkarantin»: Xitoyga quritilgan qalampir eksportiga yo‘l ochildi

O‘zbekiston Respublikasi Vazirlar Mahkamasi huzuridagi O‘simliklar karantini davlat inspeksiyasi va Xitoy Xalq Respublikasi Bosh bojxona boshqarmasi o‘rtasida O‘zbekistondan Xitoyga quritilgan qalampir eksport qilish bo‘yicha fitosanitariya talablari to‘g‘risida Bayonnoma imzolandi. Bu haqda «O‘zdavkarantin» inspeksiyasi axborot xizmati xabar bermoqda.

Xitoy tomoni talabiga ko‘ra, qalampir mahsulotlarini XXRga eksport qilishga tegishli ruxsatnomani olish uchun eksport qiladigan tadbirkorlik sub'yektlari reyestrini shakllantirish va Xitoy tomoniga tasdiqlash uchun har yili eksport mavsumi boshlanishidan kamida 2 oy oldin jo‘natish talab qilinadi.

Shu munosabat bilan, ushbu reyestrni shakllantirish uchun respublikadagi eksport qiluvchi korxonalar tomonidan tegishli ma'lumotlar o‘z vaqtida Inspeksiyaga taqdim etilishi lozim.

Yuqoridagilardan kelib chiqib, mamlakatdagi qishloq xo‘jaligi mahsulotlari eksporti bilan shug‘ullanuvchi tadbirkorlik sub'yektlari Xitoy tomonidan qo‘yilayotgan talablar bilan ushbu havola orqali tanishishi mumkin.