Surxondaryodagi qaynog‘a-kelin mojarosi Bosh prokuratura tomonidan o‘rganilayotgani ma'lum qilindi

Qayd etilishicha, mojaro tasvirlangan video ijtimoiy tarmoqlarda tarqalib, OAVda yoritila boshlagach, Bosh prokuratura tomonidan oilaviy zo‘ravonlikning oldini olish va oilaviy zo‘ravonlikdan jabr ko‘rganlarga amaliy ko‘mak berish bo‘yicha ishchi guruh tuzilgan.

“Ishchi guruhga bosh prokuror o‘rinbosari Svetlana Ortiqova rahbarlik qilmoqda. Holat o‘rganilib, taraflar xatti-harakatiga tegishli huquqiy baho beriladi. O‘rganish natijasi yuzasidan qo‘shimcha axborot taqdim etiladi”, deya Hayot Shamsuddinovning so‘zlarini keltirmoqda Kun.uz muxbiri.

Eslatib o‘tamiz, ijtimoiy tarmoqlarda tarqalgan Surxondaryoda qaynog‘a kelinini kaltaklayotgani aks etgan video ortidan Kun.uz muxbiri surishtiruv o‘tkazib, mojaroga uy-joy muammosi sabab bo‘lgani, kelinini tepkilab do‘pposlagan shaxs Denov tumanidagi «Qaqnus» xususiy tibbiyot maskani egasi, vrach Gulmurod Xandalov ekani, u ayolni ikki yildan beri muttasil kaltaklab kelganini aniqlagan edi.

Surishtiruvda jabrlanuvchi bu haqda bir necha marta mahalla uchastka noziriga, tuman IIBga va mahalla raisiga murojaat qilganiga qaramasdan, ular «daliling yo‘q», deb ayolning arizasini qabul qilmagani, hatto uchastka inspektori bir necha marta ayolning arizasini ko‘z o‘ngida yirtib tashlagani haqida ham so‘z boradi.

Avvalroq, Surxondaryo viloyat IIB kaltaklangan ayol hodisasi bo‘yicha munosabat bildirib, fuqaro murojaatlari yuzasidan surishtiruv ishlari olib borilayotgani sababli yakuni bo‘yicha qo‘shimcha axborot berilishini ma'lum qilgandi. Biroq, viloyat IIB bayonotida mahalla-profilaktika inspektorining harakatsizligi va qonunga zid harakatlariga qanday baho berilishi haqida lom-lim deyilmagan.