Kambag‘allarga 12 foiz keshbek qaytarish tartibi ma’lum bo‘ldi

Prezident qaroriga ko‘ra, 2023 yil 1 maydan “Ijtimoiy himoya yagona reyestri”ga kiritilgan jismoniy shaxslar chakana savdo obektlaridan ayrim tovarlarni sotib olganda xarid summasidan 1 foiz miqdordagi keshbek o‘rniga 12 foiz QQS qaytariladi.

Reyestrdagi shaxslarga QQS qaytarib beriladigan mahsulotlar ro‘yxati:

• Qo‘y go‘shti
• Parranda go‘shti
• Mol go‘shti
• Tuxum
• O‘simlik yog‘i

Davlat soliq qo‘mitasi keshbek qaytarish tartibini ma’lum qildi.

QQSni qaytarib olish uchun “Ijtimoiy himoya yagona reyestri”dagi iste’molchi “Soliq” mobil ilovasini yuklab olib, Face-ID orqali ro‘yxatdan o‘tishi hamda ilovada xarid chekining QR-kodini skanerlashi lozim.

QQS qaytarilishi uchun quyidagi shartlar bajarilishi kerak:

• xaridor “Ijtimoiy himoya yagona reyestri”da bo‘lishi;
• sotib olingan mahsulot QQS qaytariladigan mahsulotlar ro‘yxatiga kirishi;
• tadbirkorning QQS to‘lovchi sifatida ro‘yxatdan o‘tgani.

Reyestrdagi iste’molchi:

• QQS qaytariladigan mahsulotlar bilan birga boshqa turdagi mahsulotlarni xarid qilib chekni ro‘yxatdan o‘tkazganda, QQS qaytariladigan mahsulotlar uchun 12 foiz, boshqa turdagi mahsulotlar uchun 1 foiz keshbekka ega bo‘ladi;
• QQS to‘lovchisi bo‘lmagan tadbirkorlik sub’yektidan QQS qaytariladigan mahsulotlar sotib olganda, hozirgidek 1 foiz keshbek qaytariladi.

QQS summasi chek ro‘yxatdan o‘tkazilgan oydan keyin oyning 25-sanasidan so‘ng “Soliq” mobil ilovasi orqali to‘lab beriladi.

Avvalroq, Kun.uz jurnalisti kambag‘allarga QQSdan keshbek qaytarilishi xarid chekiga bog‘lab qo‘yilishi bu tizimning ishlamasligiga olib kelishi mumkinligi haqida yozgandi. Chunki shundoq ham kambag‘al qatlamga kiradigan odamlarda QQSni qaytarib olishda resurslar (smartfon, internet) bilan bog‘liq muammolar bo‘lishi mumkin. Boz ustiga, bu qatlam asosan dehqon bozorlarida bozorlik qiladi; bozorlarda esa aksariyat holatlarda chek berilmaydi.

Taxminiy hisoblashlar keshbek summasining juda kamligini ham ko‘rsatdi – bu esa uni qaytarib olishga qiziqish past bo‘lishiga sabab bo‘lishi mumkin.