YeI Ukraina uchun o‘q-dorilarni birgalikda xarid qilishga kelishib oldi

Ukraina uchun birgalikda o‘q-dorilar xarid qilish va Yevropa davlatlari armiyalari zaxiralarini 1 milliard yevroga to‘ldirish qarori 3 may, chorshanba kuni Yevropa Ittifoqi mamlakatlari elchilari darajasida ma’qullandi.

Murosa matni shuni ko‘rsatadiki, ushbu dastur doirasida YeI davlatlari to‘liq Yevropa Ittifoqi mamlakatlarida ishlab chiqarilgan, shuningdek, "YeI yoki Norvegiyada yig‘ilgan" artilleriya snaryadlari va raketalarini sotib oladi, dedi Bryusseldagi rasmiy DW nashriga.

Avvalroq, qo‘shma xaridlar rejasini tasdiqlash Fransiya tomonidan to‘sib qo‘yilgani ma’lum bo‘lib, u o‘q-dorilarni ishlab chiqarish va yetkazib berishning barcha zanjirlari Yevropa bo‘lishini ta’kidlagandi. Misol uchun, agar ishlab chiqarish Yevropa Ittifoqi davlatlaridan birida joylashgan bo‘lsa va porox Janubiy Koreyada ishlab chiqarilgan bo‘lsa, Parij buni nomaqbul deb hisoblaydi.

Bu Ukrainani snaryadlar va raketalar bilan zudlik bilan ta’minlash, shuningdek, YeIga a’zo davlatlarning o‘z zaxiralarini to‘ldirish uchun mo‘ljallangan Bryussel rejasi ikkinchi qismidir. Birinchi qism Yevropa Ittifoqi mamlakatlari zaxiralaridan allaqachon mavjud bo‘lgan o‘q-dorilarni Kiyevga zudlik bilan yetkazib berishni, ikkinchisi - Ukrainani yanada ta’minlash va zaxiralarni to‘ldirish uchun qo‘shma xaridlarni o‘z ichiga oladi. Yevrokomissiya dastlabki ikki bosqich uchun bir milliard yevro ajratishni taklif qildi, uning birinchi bosqichi allaqachon YeI kengashi tomonidan ma’qullangan.

Kelishuvning rasmiy varianti 4 may kuni kechqurun qabul qilinadi va 5 may kuni e’lon qilinadi, deb xabar berdi DW Bryusselda.

Avvalroq, 3 may kuni Yevrokomissiya Yevropa Ittifoqining ishlab chiqarish quvvatini oshirish hamda o‘q-dorilar, raketalar va ularning tarkibiy qismlari taqchilligini bartaraf etishga qaratilgan o‘q-dorilar ishlab chiqarishni qo‘llab-quvvatlash bo‘yicha qonunchilik taklifini ma’qullagan edi.