YeI Rossiyaga qarshi navbatdagi sanksiyalar paketini tayyorlamoqda

26 va 27 oktyabr kunlari Bryusselda bo‘lib o‘tadigan Yevropa Ittifoqi davlat va hukumat rahbarlarining yig‘ilishida Rossiyaga qarshi yangi sanksiyalar paketi ko‘rib chiqiladi, dedi 25 oktyabr, chorshanba kuni sammit oldidan DW nashriga Yevropa Ittifoqining yuqori martabali rasmiysi. Bundan tashqari, Yevropa Ittifoqi 2024 yil boshigacha joriy etilishi kutilayotgan G7 davlatlari darajasida Rossiya olmoslariga embargoni muhokama qilishi kutilmoqda. 

Yevropa Ittifoqining o‘n ikkinchi paketi nafaqat rus olmoslariga, balki alyuminiyga qarshi sanksiyalarni, shuningdek, ikki tomonlama maqsadlarda ishlatiladigan tovarlarni yetkazib berishga qo‘shimcha cheklovlarni o‘z ichiga olishi kerak, dedi rasmiy. Uning qayd etishicha, Yevropa Ittifoqi Rossiya qurollari va o‘q-dorilarida topilgan komponentlarni aniqlash masalasida Ukraina bilan yaqindan hamkorlik qilmoqda. «Bu aql bovar qilmaydigan narsa, lekin ularda hatto muzlatgich chiplari ham topildi», dedi DW nashriga yuqori martabali amaldor.

Bundan tashqari, yangi jazolar paketining muhim qismi ularni chetlab o‘tishning oldini olish mexanizmi bo‘ladi, deydi Bryusseldagilar. 

Ukrainani qo‘llab-quvvatlash ustuvor vazifadir 

Yevropa Ittifoqi rasmiylarining ishontirishicha, Yaqin Sharqdagi mojaro avj olganiga qaramay, Ukraina ustuvor vazifa bo‘lib qolmoqda. Shu tariqa, 26-27 oktyabr kunlari yetakchilar Yevropa Ittifoqining 2024-2027 yillarga mo‘ljallangan uzoq muddatli budjeti va unga Ukraina uchun kiritilgan 50 milliard yevrolik yordam jamg‘armasi hamda uning tuzilmasini muhokama qiladi. Xususan, Germaniya ko‘proq grantlar ulushini va kichikroq kreditlarni qo‘llab-quvvatlaydi. Aks holda, Ukrainaning katta davlat qarzi urush tugaganidan keyin uning uchun salbiy oqibatlarga olib keladi va Xalqaro valuta jamg‘armasi bilan munosabatlarini murakkablashtiradi, deya bashorat qilmoqda Germaniya hukumati. 

Bryusselda Rossiyaning muzlatilgan aktivlaridan foydalanishning qonuniy yo‘llari bo‘yicha muhokamalar davom etmoqda. YeI davlatlaridan birining diplomatiga ko‘ra, bu boradagi takliflarning hech biri hali kengashda yetarlicha qo‘llab-quvvatlanmadi, shuning uchun keyingi munozaralardan so‘ng, jumladan, YeI sammitida Yevropa komissiyasi yoki Yevropa Ittifoqi tashqi siyosat xizmati tomonidan ham taklif taqdim etilishi kutilmoqda. Umuman olganda, diplomatlarning fikricha, xalqaro hamjamiyat va G7 darajasida yechim topish zarurligi va ertami-kechmi yechim topilishi haqida umumiy tushuncha mavjud. 

Ukrainaga harbiy yordam davom etadi 

Ukraina prezidenti Volodimir Zelenskiy Yevropa Ittifoqi rahbarlarining uchrashuviga video-aloqa orqali qo‘shiladi. Mamlakatlar Ukrainaga kelgusida ko‘p tomonlama - moliyaviy, budjet, iqtisodiy va harbiy yordam ko‘rsatishini kafolatlaydi. Yevropa Ittifoqining yuqori martabali mulozimiga ko‘ra, uning a’zolari Kiyevga ikki tomonlama asosda harbiy yordam ko‘rsatishda davom etish niyatida. 

Vengriyaning Ukraina uchun Yevropa tinchlik jamg‘armasining navbatdagi transhini to‘sib qo‘ygan pozitsiyasi bo‘yicha amaldor shunday dedi: «Biz shu paytgacha Ukraina bo‘yicha umumiy pozitsiyaga erisha oldik. Ha, ba’zida muhokamalar qiyin bo‘lishi mumkin, masalan, Rossiyaga qarshi oltita sanksiyalar paketi masalasida. Birlikka erishish uchun ishlashda davom etamiz. Shuningdek, Yevropa Ittifoqi tashqi siyosat xizmati rahbari Jozep Borrel tomonidan tashkil etilishi taklif qilingan Yevropa tinchlik jamg‘armasi doirasida Kiyevga harbiy yordam ko‘rsatish uchun alohida jamg‘arma haqida ham gaplashamiz». 

Yevropa Ittifoqi kengashining yana bir ustuvor mavzusi Yaqin Sharqdagi vaziyatning keskinlashuvi bo‘ladi. Bundan tashqari, migratsiya masalasi va Armaniston va Ozarboyjon o‘rtasidagi mojaroning yechimi kun tartibida.