YeI sanksiyalarni chetlab o‘tganlik uchun jazo choralarini kuchaytirishga rozi bo‘ldi

Yevropa Ittifoqi Bryussel tomonidan kiritilgan sanksiyalarni chetlab o‘tishga uringanlarni yanada qattiqroq jazolashni rejalashtirmoqda. 12 dekabr, seshanba kuni Yevroparlament va Yevropa Ittifoqi davlatlari muzokarachilari ayrim sanksiyalardan bo‘yin tovlaganlik uchun javobgarlikka tortish bo‘yicha dastlabki siyosiy kelishuvga erishdi. Xususan, tegishli davlatga sanksiya qo‘yilgan tovarlarni sotish yoki qora ro‘yxatga kiritilgan shaxslarga Yevropa Ittifoqi hududiga kirishda yordam berish jinoiy huquqbuzarlik sifatida tasniflanadi, deb xabar qildi Yevrokomissiya.

Kompaniyalar va jismoniy shaxslar sanksiyalarni chetlab o‘tishdagi ishtiroki uchun jazolanadi

Bundan tashqari, taqiqlangan moliyaviy xizmatlar ko‘rsatish yoki qora ro‘yxatdagi shaxslarning mol-mulkini yashirish ham jazolanadi. Fitna qo‘zg‘atish yoki sanksiyalarni chetlab o‘tishga yordam berish jinoiy javobgarlikka sabab bo‘ladi.

Muayyan sharoitlarda kompaniyalar ham sanksiyalardan bo‘yin tovlashda ishtirok etgani uchun javobgarlikka tortiladi. Ta’kidlanganidek, bu qoidalar Yevropa Ittifoqi tomonidan Rossiyaga nisbatan joriy qilingan sanksiyalar bilan bog‘liq holda alohida ahamiyatga ega. Hozirda Yevropa Ittifoqi Rossiyaga qarshi navbatdagi, 12-sanksiya paketini tayyorlamoqda.

YeI jinoiy yo‘l bilan olingan aktivlarni musodara qilishni rejalashtirmoqda

Bundan tashqari, Yevrokomissiya jinoiy faoliyat bilan bog‘liq aktivlarni Yevropa Ittifoqiga qaytarish va ularni musodara qilish chora-tadbirlarini kuchaytirish bo‘yicha siyosiy kelishuvga erishilgani haqida xabar berdi. Rasmiy qabul qilingandan so‘ng, ushbu direktiva uyushgan jinoyatchilikka qarshi kurashda asosiy omilga aylanadi va jinoyatchilarning o‘z faoliyatini saqlab qolish va kengaytirish imkoniyatlarini cheklaydi, deyiladi bayonotda.

Har ikkala hujjat ham Yevroparlament va Yevropa Ittifoqi mamlakatlari tomonidan rasman tasdiqlanishi kerak.