Ta’limdagi tenglik: Toshkent amaliy fanlar universiteti misolida

Jahon bankining ta’lim va gender masalalariga bag‘ishlangan hisobotiga ko‘ra, dunyo miqyosida har o‘n qiz bolaning to‘qqiz nafari boshlang‘ich ta’lim, to‘rtdan uch nafari esa o‘rta ta’lim (taxminan, 9 yillik o‘qish) oladi. Kam daromadli mamlakatlarda qizlarning 2/3 qismi boshlang‘ich maktabda o‘qiydi, faqat har uch qizdan biri o‘rta maktabning quyi bosqichini (tugallanmagan o‘rta ta’lim) tugatadi. Oliy ta’limda bu raqamlar yana qisqarib boradi. Ammo Oliy ta’limda xotin-qizlar faolligini oshirish davlat budjetini tejash va mamlakat taraqqiyotiga yordam ham berishi mumkin. 

O‘zbekiston misolida olinsa, bugun Oliy ta’lim muassasalarida 1 mln 300 mingdan ortiq talabalar tahsil olishadi. Shundan 660 ming nafari erkaklar bo‘lsa, 680 ming nafari xotin-qizlardan iborat. Birgina Toshkent amaliy fanlar universitetida talaba sifatida 10 ming 985 nafar erkaklar, 16 ming 152 nafar xotin-qizlar ta’lim olishyapti.

Bu haqida 23 aprel kuni Toshkent amaliy fanlar universitetida bo‘lib o‘tgan “Xotin-qizlar va erkaklarning butun umr davomida o‘qish imkoniyatlarini rag‘batlantirish: yutuqlar va muammolar” mavzusidagi xalqaro forumda ham aytib o‘tildi. Universitet rektori Abdusalom Umarov muassasada ayollarga ta’lim olishda imtiyozlar yaratilayotganini aytdi. 

Forum Oila va xotin-qizlar qo‘mitasi bilan hamkorlikda tashkil etildi va jamiyatda gender tenglikni ta’minlash, ilm-fan va ta’lim tizimida ayollarning salohiyatini oshirishga bag‘ishlandi.