Таълимдаги тенглик: Тошкент амалий фанлар университети мисолида

Жаҳон банкининг таълим ва гендер масалаларига бағишланган ҳисоботига кўра, дунё миқёсида ҳар ўн қиз боланинг тўққиз нафари бошланғич таълим, тўртдан уч нафари эса ўрта таълим (тахминан, 9 йиллик ўқиш) олади. Кам даромадли мамлакатларда қизларнинг 2/3 қисми бошланғич мактабда ўқийди, фақат ҳар уч қиздан бири ўрта мактабнинг қуйи босқичини (тугалланмаган ўрта таълим) тугатади. Олий таълимда бу рақамлар яна қисқариб боради. Аммо Олий таълимда хотин-қизлар фаоллигини ошириш давлат бюджетини тежаш ва мамлакат тараққиётига ёрдам ҳам бериши мумкин. 

Ўзбекистон мисолида олинса, бугун Олий таълим муассасаларида 1 млн 300 мингдан ортиқ талабалар таҳсил олишади. Шундан 660 минг нафари эркаклар бўлса, 680 минг нафари хотин-қизлардан иборат. Биргина Тошкент амалий фанлар университетида талаба сифатида 10 минг 985 нафар эркаклар, 16 минг 152 нафар хотин-қизлар таълим олишяпти.

Бу ҳақида 23 апрел куни Тошкент амалий фанлар университетида бўлиб ўтган “Хотин-қизлар ва эркакларнинг бутун умр давомида ўқиш имкониятларини рағбатлантириш: ютуқлар ва муаммолар” мавзусидаги халқаро форумда ҳам айтиб ўтилди. Университет ректори Абдусалом Умаров муассасада аёлларга таълим олишда имтиёзлар яратилаётганини айтди. 

Форум Оила ва хотин-қизлар қўмитаси билан ҳамкорликда ташкил этилди ва жамиятда гендер тенгликни таъминлаш, илм-фан ва таълим тизимида аёлларнинг салоҳиятини оширишга бағишланди.