KPMG: Germaniya kompaniyalari Ukrainaga sarmoya kiritishni rejalashtirmoqda

Urush davom etayotganiga qaramay, Ukrainada faoliyat yuritayotgan nemis kompaniyalari bu mamlakatdagi iqtisodiy vaziyatga optimistik qarayapti. Ukrainadagi nemis firmalarining 43 foizi yangi sarmoya kiritishni rejalashtirmoqda, deb xabar berdi KPMG xalqaro auditorlik kompaniyasi 10 iyun, dushanba kuni Germaniya-Ukraina Savdo-sanoat palatasi bilan hamkorlikda aprel-may oylarida 142 kompaniya o‘rtasida o‘tkazilgan so‘rov ma’lumotlariga tayanib.

Shu bilan birga, respondentlarning 42 foizi yaqin 12 oy ichida Ukrainadagi iqtisodiy vaziyat yaxshilanishini kutayotganini, yana 10 foizi esa yomonlashishini ma’lum qilgan. 

Ukrainaga sarmoya kiritishning ijobiy va salbiy tomonlari 

Ukrainaning qulay sarmoyaviy muhitga bozorga kirish, malakali kadrlar mavjudligi va urushdan vayron bo‘lgan mamlakatni qayta tiklash bo‘yicha xalqaro dasturlar borligi turtki beradi. Kompaniyalar to‘siqlar orasida davom etayotgan urush, xodimlarning xavfsizligi uchun xatarlar va mahalliy korrupsiyani sanab o‘tgan. Bundan tashqari, Ukrainaning safarbarlik to‘g‘risidagi qonuni ishchi kuchi mavjudligini cheklaydi. 

Ayni paytda, 11 iyun kuni Berlinda Ukrainani tiklash bo‘yicha ikki kunlik konferensiya boshlanadi, unda 2 mingga yaqin ishtirokchi kutilmoqda. Germaniya hukumati shu bilan Ukrainani qayta tiklash bo‘yicha uzoq muddatli istiqbolni taqdim etish va sarmoyalarni rag‘batlantirish niyatida. Boshqa narsalar qatorida, gap Rossiyaning davom etayotgan hujumlari fonida favqulodda yordam ko‘rsatish masalalari haqida ketyapti.