IT соҳаси бўйича дунёнинг энг бой 5 одами

IT соҳаси бугунги куннинг энг замонавий, инновацион ва истиқболли тармоқларидан бирига айланиб қолди. Шу боис ушбу соҳада фаолият юритиб, йирик молиявий ютуқларга эришаётган инсонлар сони ҳам тобора ортиб бормоқда.

Forbes биринчи марта жаҳоннинг мазкур соҳа орқали миллиардлар ишлаган бойваччалари рейтингини эълон қилди. Мутахассисларнинг фикрича, ушбу соҳадаги энг бой юз шахснинг умумий бойлиги 842.9 млрд долларни ташкил қилади. Дастлабки еттиликка ушбу маблағнинг 231.4 млрд долларлик қисми тегишли.

IT соҳаси бўйича дунёнинг энг бой 5 одами қуйидагилардир:

1. Билл Гейтс – 79.2 млрд доллар. У айни пайтда сайёрамизнинг энг бой одами ҳамдир. Microsoft асосчиларидан бири нафақат энг йирик миллиардер, у хайрияга пул ажратиш бўйича ҳам биринчиликни забт этган. Очиқ манбаларга кўра, 1994-2010 йилларда у Билл ва Мелинда Гейстлар жамғармасига 28 млрд доллар киритган. 2010 йилда эса у барча миллиардерларга бойлигининг ярмини хайрия ишларига сарфлашни таклиф қилди;

2. Ларри Эллисон – 54.3 млрд доллар. Oracle асосчиси илк бора Forbes рўйхатларида 1986 йили тилга олинди – ўшанда унинг бойлиги бор-йўғи 185 млн долларни ташкил қиларди. 2014 йилнинг сентябридан миллиардер ўзи асос солган компания бош директорлигини ташлаб, корпорациянинг дастурий ва аппарат таъминоти йўналишини бошқариш билан шуғулланиб келмоқда.

3. Жефф Безос – 34.8 млрд доллар. Amazon интернет дўконлари тармоғидан ташқари, унга Blue Origin аэрокосмик компанияси ҳамда The Washington Post матбаа уйи ҳам тегишлидир. Унинг фаолияти муваффақиятсизликлардан ҳам ҳоли эмас: 2014 йили бозорга ўз смартфонини чиқаришга бўлган уриниш омадсизлик билан якунланди.

4. Марк Цукерберг – 33.4 млрд доллар. Жаҳондаги энг йирик ижтимоий тармоқ бўлмиш Facebook.com асосчиси. Унга Instagram фотосервиси ва WhatsApp мессенжери ҳам тегишлидир. Бундан ташқари, у жаҳон тарихидаги энг ёш миллиардер ҳамдир. 2015 йил декабрида Цукерберг ўзининг қарийб бутун бойлигини хайрияга сарфлашини маълум қилди.

5. Ларри Пейж – 29.7 млрд доллар. Google компанияси асосчиларидан бири. 2014 йили у уй учун инновацион техника ишлаб чиқарувчи Nest Labs ҳамда кузатув камералари ишлаб чиқарувчи Dropcam компанияларини харид қилди. Ларри Сергей Брин билан биргаликда Boeing 767 йўловчи самолётини харид қилган.