iPhone 8'нинг якуний дизайни намойиш этилди

Ижтимоий тармоқларда iPhone 8 макетининг янги суратлари тарқалди. Суратлар BGR порталига жойланди.

Манбада таъкидланишича, макет Apple'да тасдиқланган iPhone 8 чизгилари бўйича ишланган. Уларнинг сўзларига кўра, янги iPhone айнан шундай кўринишга эга бўлади. Суратларда Apple'нинг янги смартфони орқа қопқоғи шишадан ишлангани, иккиламчи камера эса вертикал бўлишини кўриш мумкин. Шунингдек, худди iPhone 7'да бўлгани каби 3,5 миллиметрли қулоқчин улагич йўқ.

Макетда TouchID сканерли Home тугмаси йўқ. Эҳтимол, Apple бармоқ излари сканерини смартфоннинг орқа қопқоғига эмас, экранга ўрнатар.

Латвиялик блогер Бенджамин Гескин 2017 йилнинг апрелидаёқ ўзининг Twitter'ида  шунга ўхшаш суратларни чоп этганди. Унинг сўзларига кўра, суратларда ишчи прототип эмас, корхонада яратилган смартфонлар макети тасвирланган бўлган.

Янги iPhone 2017 йилнинг кузги мавсумида, Apple'нинг доимий тақдимотида намойиш этилади. Маълумотларга кўра, смартфон 5,8 дюймли OLED-дисплейга эга бўлади.