Ўзбекистон футзал термаси устози Тожикистон устидан қозонилган ғалабага изоҳ берди

Ўзбекистон футзал терма жамоаси бош мураббийи Баҳодир Аҳмедов Осиё чемпионати гуруҳ босқичидан ўрин олган Тожикистонга (4:2) қарши кечган ўйиндан сўнг, ўз фикрларини билдирди.

«Тожикистонга қарши баҳс осон кечмаслигини билардик. Шунга қарамай, ўз ўйинимизни кўрсатиб, ғалаба қозондик. Тожикистон шаклланган жамоа эканини, агрессив ўйнай олишини кўрсатди.

Ажойиб баҳс ўтказгани учун йигитларга раҳмат айтаман. Умуман олганда, жамоанинг кўрсатаётган ўйинидан мамнунман.

Ўйиндан ўйинга кучайиб боряпмиз ва шу руҳда давом этишимиз керак. Эртадан Японияга қарши беллашувга тайёргарлик кўрамиз ва ушбу ўйинни ҳам ўз фойдамизга ҳал қилишга ҳаракат қиламиз. Мақсадимиз — ҳар бир ўйинда зафар қучиш», – деди Баҳодир Аҳмедов.