Каримов фонди нега халқаро коалицияга Қарши-Хонобод аэродроми тақдим этилганини маълум қилди

Бундан 17 йил аввал, 2001 йил 11 сентябрь куни АҚШда 3000га яқин инсон ҳаётига зомин бўлган фожиа – тарихдаги энг мудҳиш террорчилик ҳужуми рўй берди, деб ёзмоқда Ислом Каримов фонди Facebook’даги саҳифасида.

Худкуш қўпорувчилар тўдаси тўртта йўловчи самолётини гаровга олди, уларнинг иккитаси Нью-Йоркдаги Жаҳон савдо маркази жойлашган 110 қаватли эгизак биноларга бориб урилди, учинчи самолёт АҚШ Мудофаа вазирлигининг Вашингтондаги биносига, тўртинчиси эса Питтсбург шаҳридан 80 миль нарига қулади. 
Ушбу даҳшатли воқеа, таъбир жоиз бўлса, дунёни остин-устун қилиб юборди.

Халқаро коалиция кучлари томонидан Афғонистонда аксилтеррор операцияларини муваффақиятли амалга оширишда эса Ўзбекистон Президенти Ислом Каримовнинг қўллаб-қувватлаши муҳим роль ўйнади. Дарҳақиқат, Ислом Каримовнинг позицияси муҳим аҳамият касб этди. 1989 йили Афғонистондан совет қўшинлари чиқиб кетгач, Ўзбекистон ушбу мамлакатдан ёйилаётган таҳдидларга қарши ёлғиз ўзи курашишга мажбур бўлганини инобатга олиш керак. 

“1997 йили толиблар Ўзбекистон сарҳадларига яқин келиб, мамлакатнинг чегара шаҳри – Термизнинг аҳоли яшаш мавзеларига ракета отиб, очиқ-ошкора таҳдид солган пайтда ҳам ёш давлатимизга чегарани мустаҳкамлаш ва мудофаа қобилиятини ошириш борасида ҳеч ким амалий ёрдам кўрсатмаган. 

Таъкидлаш жоизки, ўша кезлар Афғонистон Марказий Осиё давлатларидаги дунёвий тузумларни ағдариб, диний фундаментализм тамойилларига асосланган бошқарувни ўрнатишга ҳаракат қилган радикал кайфиятдаги жангарилар тайёргарликдан ўтадиган асосий марказлардан бири эди. Мазкур кучлар Ўзбекистонда террорчилик актларини содир этган, қўшни Тожикистондаги фуқаролар урушида ҳам қатнашган эди. Бу жиҳатдан, 1990-йилларда Толибон режимига қарши тура оладиган асосий куч саналган “Шимолий альянс” тор-мор этилгач, мутаассиб жангарилар вақт ўтиши билан Марказий Осиё давлатлари, жумладан, Ўзбекистонда фаол ҳаракат бошлаши кундек равшан эди”, - деб ёзади И.Каримов фонди.

Буларнинг барини ҳисобга олган Ислом Каримов “кимнинг қўли баланд келаркан” дея томошабин бўлиб турмади, билъакс, қўшни мамлакатдаги террорчилар ўчоғига айланган барча лагерларни ёпишга ваъда берган халқаро коалиция кучларига баҳоли қудрат ёрдам кўрсатди. 

2001 йил 30 сентябрь ва 5 октябрь кунлари АҚШ Қуролли кучлари Марказий қўмондонлиги қўмондони Томми Фрэнкс ҳамда АҚШ Мудофаа вазири Дональд Рамсфельд Тошкентга келиб, президент Ислом Каримов билан учрашдилар.

“Эришилган келишувга кўра, Ўзбекистон жанубидаги Қарши-Хонобод аэродроми АҚШ бошчилигидаги халқаро коалицияга аксилтеррор операция ўтказиладиган муддатга берилди. Аэродром орқали Афғонистон аҳолисига гуманитар ёрдам кўрсатиш, қўшиннинг фронт орти таъминоти, шунингдек, қидириш ҳамда қутқариш операциялари каби чора-тадбирлар амалга оширилиши кўзда тутилган эди”, - дейилади фонд хабарида.