Эстония бош вазири Путин билан музокарага киришмасликка чақирди

Эстония бош вазири Кая Каллас Россия президенти Владимир Путин билан Украинадаги вазиятни тинч йўл орқали ҳал қилиш бўйича музокараларга киришмасликка чақирди. «Биз террорчилар билан музокара қилмаслигимиз керак, чунки бу улар учун фойдали. Узоқ муддатли истиқболда биз юқорироқ нарх тўлашга мажбур бўламиз», деди Каллас бундай музокараларни бошлаш истиқболлари ҳақида Британиянинг The Telegraph газетасига берган интервьюсида. Суҳбат бир неча кун аввал Прагада бўлиб ўтган Европа сиёсий ҳамжамиятининг (ЕСҲ) саммити доирасида уюштирилди.

«Путинга келсак, у, албатта, ҳарбий жиноятчи ва содир этган босқинчилик жиноятлари учун жазоланиши керак», — деди Эстония ҳукумати раҳбари.

Шу билан бирга, Каллас Ғарб иттифоқчилари Украинани «улар (украиналиклар) ҳали тайёр бўлмаган муддатидан олдин тинчлик музокараларига» кўндириши мумкинлигидан хавотир билдирди. Эстония бош вазирининг сўзларига кўра, Ғарб авваллари «темир парда» ортида турган давлатлар учун тинчлик нимани англатишини «бутунлай бошқача тушунади». «Европанинг ярми учун Иккинчи жаҳон урушининг тугаши тинчлик, фаровонлик дегани эди, - деб тушунтирди у. - Европанинг нариги томонида тинчлик дегани ваҳшийлик, қийноқлар ва оммавий депортациялар назарда тутилган».

The Telegraph нашрининг ёзишича, Кая Калласнинг онаси атиги олти ойлик бўлганида, совет ҳукумати буйруғи билан унинг оиласи мол ташиш учун мўлжалланган вагонга жойлаштирилиб, Сибирга сургун қилинган. У Эстонияга фақат ўн ёшида қайтиб келган.

Август ойи ҳолатига кўра, Эстония Киевга 250 миллион евро миқдоридаги ҳарбий ёрдам, жумладан, Javelin танкка қарши ракеталар, гаубицалар, танкка қарши миналар, гранатомётлар, ўқ-дорилар ва автомашиналар юборган.

The Telegraph нашрининг ёзишича, дунёнинг ҳеч бир давлати Украинага ялпи ички маҳсулотнинг аҳоли жон бошига нисбатида Эстониядан кўпроқ ҳарбий техника тақдим этмаган.

Прагада бўлиб ўтган ЕСҲ саммитида Кая Каллас Европа иттифоқининг Украина учун янада кўпроқ қурол-яроғ ажратиш ва Россияга қарши янги санкциялар киритиш ҳақидаги ўз талабларини такрорлади.

Европада «сиёсий ҳамкорлик, хавфсизлик ва энергетика соҳасида ҳамкорлик бўйича» янги ташкилот – Европа сиёсий ҳамжамиятини яратиш ташаббуси Франция президенти Эммануэл Макрон томонидан 2022 йилнинг май ойида, Украина Европа иттифоқига аъзо бўлиш учун ариза топширганидан сўнг илгари сурилган эди.

6 октябр куни Прагада очилган ва Европа иттифоқининг норасмий саммити билан параллель равишда ўтказилган биринчи ЕСҲ саммитида Туркия, Украина ва Косово каби 44 давлат раҳбарлари иштирок этди. Унга Россия ва Беларус таклиф қилинмади.