Мюнхен хавфсизлик конференцияси раиси: Украина НАТОга аъзо бўлиши керак

Мюнхен хавфсизлик конференцияси раиси Кристоф Ҳойсген Шимолий Атлантика альянсининг Вилнюсдаги саммити арафасида Украинанинг НАТОга қўшилиши тарафдори эканини айтди. Ҳойсген 10 июль, душанба куни Der General-Anzeiger Bonn ва Die Rheinische Post нашрларига интервью берди.

«Украина НАТОга аъзо бўлиши керак ва бўлади - шароитлар имкон берган заҳоти», деди собиқ канцлер Ангела Меркелнинг ташқи сиёсат бўйича собиқ маслаҳатчиси. Шу билан бирга, Украинанинг ушбу босқичда қабул қилиниши ҳақида гап бўлиши мумкин эмас, чунки бу Шимолий Атлантика шартномасининг 5-моддаси бўйича Киевга ёрдам кўрсатиш мажбурияти фонида иттифоқни тўғридан тўғри урушга олиб келади. «Бироқ Вилнюс саммити Украинанинг НАТО оиласига тегишли эканлигини аниқ кўрсатиши керак. Биз кейинги босқичда Украинанинг тўлиқ аъзо бўлиш шартларини муҳокама қилиш учун НАТО-Украина кенгашидан фойдаланишимиз лозим», - дея таъкидлади Ҳойсген. 

Конференция раҳбарининг сўзларига кўра, Киев ўзини ҳимоя қилиш учун барча зарурий ҳарбий воситалар билан таъминланиши керак, «акс ҳолда Украина мавжуд бўлишни тўхтатади». Киевнинг НАТОга аъзолиги «мамлакатни қайта қуриш учун зарур бўладиган улкан сармоя учун» энг яхши суғурта, дея қўшимча қилди у. «Умид қиламанки, АҚШда ишлаб чиқарилган F16 қирувчиларининг режалаштирилган ёрдами Украина ҳавода Россиянинг агрессиясидан яхшироқ ҳимояланиши учун тақдим этилади», - деди форум раҳбари. «F16 қирувчиларига эга бўлмаган Германия логистика ва ўқув машғулотларида ёрдам бериши мумкин», - деди у. 

Кристоф Ҳойсген, шунингдек, россиялик ҳарбийлар ва «Вагнер» хусусий ҳарбий кампанияси ёлланма аскарларининг «ақл бовар қилмайдиган шафқатсизлигидан сўнг» Украинанинг бетараф бўлиш имкониятини энди тасаввур қилмаслигини қўшимча қилди. Бу фонда Украина етакчиси Володимир Зеленский «НАТО ҳимоя соябони остига киришга ҳаракат қилмоқда», деди нашрлар суҳбатдоши. 

11-12 июль кунлари Вилнюсда НАТО саммити бўлиб ўтади.