Тошкент вилоятида газдан ноқонуний фойдаланиб келган яширин цехлар аниқланди

Бош прокуратура ҳузуридаги департамент хабарига кўра, Зангиота туман бўлими томонидан газ таъминоти бўлими ходимлари билан ҳамкорликда терговга қадар текширув ўтказилган. Текширув давомида якка тартибдаги тадбиркор К.К. ўз уйида фуқаро Қ.Л. билан ишлаб чиқариш цехи ташкил қилиб, умумий фойдаланишдаги газ тармоғига ҳеч қандай ҳужжатсиз тижорат мақсадида уланиб, 141,9 миллион сўмлик табиий газдан ноқонуний фойдалангани аниқланган.

Шу каби, департаментнинг Тошкент туман бўлими томонидан ИИБ ва газ таъминоти бўлими ходимлари билан ҳамкорликда ўтказилган тезкор тадбирда фуқаро У.Ж “Б.” МФЙ ҳудудидаги уйида яширин цех ташкил қилиб, ўғирлик йўли билан табиий газ тармоғига уланиб олиб, истеъмолчиларнинг ҳаёти ва соғлиғи хавфсизлиги талабларига жавоб бермайдиган чипс маҳсулотларини ишлаб чиқараётгани аниқланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.