28 апрел куни Ўзбекистондаги илк информацион телеканал – UzReport TV ташкил этилганига 10 йил тўлди.
Телеканал Ўзбекистонда биринчилардан бўлиб Reuters, Bloomberg, CCTV каби халқаро ахборот агентликлари ва Discovery, National Geographic лойиҳалари билан ҳамкорликни йўлга қўйган.
24 соат эфирга узатиладиган телеканал 2014 йилда ташкил этилган бўлса, UzReport ахборот агентлиги 1999 йилдан буён фаолият олиб боради.
Президент администрациясининг ахборот сиёсати департаменти раҳбари Комил Алламжонов юбилей муносабати билан Равшан Жўраев, Гулноза Ҳусанова бошчилигидаги ижодий жамоани табриклади.
“Сўз эркинлиги, маълумотларнинг холис ва тезкор етказилиши, одамларнинг ахборотга бўлган эҳтиёжини қондириш борасида катта ҳиссангиз бор. Ислоҳотлар ва жамоатчиликни қизиқтирган масала-муаммоларнинг ёритилишида ўзгача, профессионал ёндашувингиз билан ажралиб турасиз.
Назаримда, худди яқинда пайдо бўлган телеканал эди, ваҳоланки, мана, орадан 10 йил ўтибди. Телеканал 100 ёшга тўлганда ҳам, ўз аудиториясини йўқотмасин”, – дея ёзди Алламжонов Telegram-саҳифасида.
