G7 Киевдан коррупцияга қарши курашни давом эттиришни сўраяпти

Коррупцияга қарши кураш, Украинадаги вазият ва уюшган жиноятчиликка қарши биргаликдаги саъй-ҳаракатлар 9 май, пайшанба куни бошланган Венецияда «катта еттилик» мамлакатлари адлия вазирларининг икки кунлик йиғилишида муҳокама қилинган мавзулар бўлади. Тадбирнинг италиялик ташкилотчилари айтишича, гап Украинада демократик институтларни мустаҳкамлаш ва мамлакатни қайта қуриш учун ажратилган пуллардан ноқонуний фойдаланиш олдини олиш ҳақида кетмоқда.

Германия адлия вазири Марко Бушман Украинада коррупция билан боғлиқ учта асосий муаммони айтиб ўтди. Биринчидан, армияга сарфланиши керак бўлган, аммо коррупцияга кетаётган ҳар бир евро Украинани Россиядан ҳимоя қилишда заифлаштиради, дея тушунтирди у dpa нашрига. 

Иккинчидан, Бушманга кўра, Украина Европа Иттифоқига аъзолик йўлида юқори даражадаги коррупцияга қарши курашиши керак. Учинчидан, агар ёрдамнинг катта қисми коррупцияга кетса, потенциал донор давлатлар Киевга кейинчалик ёрдам беришни хоҳламай қолади.

Германия вазирининг сўзларига кўра, Украина президенти Володимир Зеленский бу муаммодан хабардор ва шунинг учун коррупцияга қарши курашни ўз фаолияти асосий йўналишларидан бирига айлантирган. «Биз уни бу борада қўллаб-қувватламоқчимиз», деб таъкидлади Марко Бушман. 

Киев маҳбуслардан 10 минг аскар ёллашга умид қилмоқда 

Украинадан Венецияда бўлиб ўтган йиғилишда адлия вазири Денис Малюска, унинг Европа интеграцияси бўйича ўринбосари Людмила Сугак, шунингдек, бош прокурор Андрей Костин иштирок этди. 

Малюска «катта еттилик» мамлакатларидаги ҳамкасблари билан суҳбатда мамлакатни тарк этиб, ҳарбий хизматдан бўйин товлаган эркакларни қандай оқибатлар кутаётганини Олий рада ҳал қилиши кераклигини айтди. Унинг сўзларига кўра, мамлакат расмийлари бу одамларнинг ўз ватанларида узоқ вақт йўқ бўлишини истамайди, чунки улар ўша ерда керак.

Украина Адлия вазирлиги раҳбари, шунингдек, Киев яқинда қабул қилинган маҳбусларнинг бир қатор тоифаларини ихтиёрий сафарбар этишни назарда тутувчи қонун туфайли 10 минггача қўшимча аскар ёллашга умид қилаётганини таъкидлади. 

Денис Малюсканинг сўзларига кўра, унинг Венециядаги музокаралари асосий йўналишларидан бири музлатилган Россия капиталидан олинган фойдадан Украина эҳтиёжлари учун фойдаланиш бўлган.