Тошкентдаги Miran меҳмонхонаси ҳудудида ёнғин чиқди

16 октябр куни Тошкент шаҳри Миробод туманида жиддий ёнғин чиқди. ФВВ матбуот хизмати берган хабарга кўра, соат 17:17 да Шаҳрисабз кўчасида, қурилиш олиб борилаётган бинода ёнғин содир бўлаётгани тўғрисида хабар тушган.

Шунга кўра, ёнғин-қутқарув экипажи соат 17:24 да воқеа жойига етиб бориб, ёнғинни ўчириш ишлари бошланган.

Воқеа жойига Тошкент шаҳар ФВБ ва Фавқулодда вазиятлар вазирлиги раҳбариятидан маъсуллар чиққан.

Гувоҳлар томонидан олинган видеоларда Miran меҳмонхонаси жойлашган бинонинг том қисми ёнаётгани акс этган.

Ҳозирда ушбу манзилда тан жароҳати олган ва ҳалок бўлганлар тўғрисида маълумот келиб тушмаган.

UPD: ФВВ воқеа жойига 14 та ёнғин-қутқарув экипажи етиб бориб, ёнғин соат 18:19 да қуршаб олингани ва соат 19:16 да бартараф этилганини маълум қилди.