Ўзбекистоннинг 23 та олийгоҳи Осиё университетлари рейтингига кирди

Осиёдаги энг яхши университетларнинг янги рейтингига Ўзбекистоннинг 23 та олийгоҳи кирди. Бироқ, улардан ҳеч бири юқори юзталикдан жой олмади. Бу ҳақда QS Asia University Rankings 2025 маълумотларидан ойдинлашмоқда.

Осиёнинг 25 та мамлакатидаги 985 та олий таълим даргоҳи рейтингга киритилган. Олийгоҳлар тадқиқот ва ихтиролар, таълим бериш тажрибаси (талабалар ва ўқитувчилар сони нисбати, докторлик даражасига эга ўқитувчилар), глобал ҳамкорлик (халқаро тадқиқот тизими, хорижлик талабалар, халқаро факултетлар), ишга жойлаштириш, инглиз тили ва бошқа академик тест натижалари каби критериялар асосида баҳоланган.

Энг яхши олий таълим даргоҳи сифатида Хитойнинг Пекин университети қайд этилди. Ушбу олийгоҳ 100 балл тўплади. Юқори бешликдан Ҳонгконг университети, Сингапур миллий университети, Нанянг технология университети (Сингапур) ва Фудан университети (Хитой) ҳам жой олди.

Рейтингга Ўзбекистоннинг 23 та олий таълим даргоҳи киритилди, аммо улардан ҳеч бири юқори юзталикдан жой олмади. Энг яхшиси сифатида Тошкент ирригация ва қишлоқ хўжалигини механизациялаш муҳандислари институти қайд этилган. Ушбу олийгоҳ рейтингда 44,9 балл билан Осиёда 159-ўринни, Марказий Осиёда 7-ўринни эгаллади.

Умуман олганда, 23 та олийгоҳдан фақат тўрттаси рейтинг балларини тўплашга эришган холос. Жумладан, Ўзбекистон Миллий университети 34,5 балл билан 242-ўринда, Тошкент давлат иқтисодиёт университети 25,7 балл билан 359-ўринда, Тошкент давлат техника университети 25,5 балл билан 368-ўринда қайд этилган.

Рейтингда Қозоғистоннинг 35 та олийгоҳи қайд этилди. Улардан олтитаси Марказий Осиёда етакчи ўринларни эгаллаб турибди.

Шунингдек, рейтингга Қирғизистоннинг 6 та олийгоҳи, Тожикистоннинг 1 та олийгоҳи киритилди. Туркманистоннинг бирорта олийгоҳи рейтингдан жой олмади.