Toshkentda qor tufayli daraxtlar sinib tushib, avtotransportlar harakatiga xalal berish hollari ro‘y bermoqda

27 yanvar kuni yog‘a boshlagan va bugun ham davom etgan qor tufayli Toshkentning bir nechta tumanlarida yo‘l chekkalaridagi daraxtlar sinib, avtotransportlar harakatini qiyinlashtirdi. Bu holatlar tasvirlari Facebook ijtimoiy tarmog‘idagi «Voditeli Tashkenta» guruhiga joylashtirilgan.

Guvohlarning so‘zlariga ko‘ra, singan daraxtlar yo‘llarni to‘sib qo‘ygan va bu avtomobillar harakatini qiyinlashtirib, yo‘l transport hodisalariga sabab bo‘lmoqda.

Tarmoqqa joylashtirilgan suratlardan birida Chevrolet Spark avtomobili ustiga daraxt ag‘anab tushgani aks etgan. Qayd etilishicha, hodisa oqibatida mashina salonidagilar jabrlanmagan, faqat avtomobilning old qismiga shikast yetgan.