Viza turlari, uni olishdagi talablar va xarajatlar – “Esmeralda yurti” vizasi haqida

UzbekLife xorijiy mamlakatlar vizalari haqidagi turkum materiallarni berishda davom etadi. Ushbu maqola orqali ko‘plar uchun qiziq bo‘lgan Meksika mamlakati vizasi turlari, ularni olish tartibi va to‘lovlari borasida ma'lumot beramiz.

Meksika ispan tilida so‘zlashadigan mamlakatlarning eng kattasi bo‘lib, boy madaniyatga va tarixiy merosga ega. Ularning aksariyati YuNESKO’ning Jahon merosi obektlari hisoblanadi. Bu dunyodagi eng ko‘p tashrif buyuradigan joylardan biri bo‘lib, har yili millionlab sayyohlarni jalb qiladi. Ular Meksikaning jonli hayot tarzidan bahramand bo‘lishni istaydilar. Shu bilan birga, bu mamlakat ishlashni yoki Meksikadagi ta'lim muassasasida o‘qishni davom ettirishni istagan chet elliklarni o‘z bag‘riga jalb qiladi.

Meksika viza turlari

Meksika vizalarining yashash muddatiga qarab uchta asosiy turi mavjud:

Meksika sayyohlik vizalari. 180 kungacha bo‘lgan qisqa muddatga beriladi. Ular Meksikaga sayyohlik, biznes, tashrif yoki boshqa maqsadlar uchun kirishni istagan vizali chet el fuqarolariga beriladi.

Sayyohlik vizasidan tashqari, barcha xorijiy fuqarolar, millatidan qat'i nazar, Meksikaga kirishdan oldin Meksika turistik kartasini olishlari shart.

Meksika turistik kartasi nima?

Meksika sayyohlik kartasi (Forma Migratoria Múltiple, FMM) – bu har bir chet el fuqarosi Meksikaga kirishdan oldin olishi kerak bo‘lgan ruxsatnoma. Unda mamlakatda qolish uchun ruxsat berilgan va tugashidan oldin siz jo‘nab ketishingiz kerak bo‘lgan kunlar soni ko‘rsatilgan. Shuningdek, bu karta sizning shunchaki sayyoh ekanligingizni va ishlashga ruxsat berilmaganini ko‘rsatuvchi ruxsatnomadir. Siz doimo kartani yoningizda saqlashingiz zarur.

Meksikaga sayyoh sifatida kirgan har bir kishi turistik kartani olishi shart. Bunga Meksikaning turistik vizalaridan ozod qilingan davlatlarning fuqarolari ham kiradi.

Siz sayyohlik kartasini Meksikaga kirish joyidan yetib borganingizdan so‘ng olishingiz mumkin. Ba'zi aviakompaniyalar hattoki sayyohlik kartasini chipta narxi bilan birga taklif qilishadi. Shu bilan birga, siz sayohat qilishdan 7 kun oldin onlayn ravishda Meksika turistik kartasini olsangiz bo‘ladi. Ikkalasining farqi shundaki, viza amal qiladigan mamlakatlar fuqarolari turistik viza olish uchun elchixonaga murojaat qilishlari kerak. Agar ular vizani olsalar, turistik kartani ham olishlari lozim. Vizadan ozod etilgan chet elliklar, Meksikaga kirishdan yoki sayohat qilishdan oldin, faqatgina Tourist card’ni olishlari kerak – bu yerda Tourist visa’ga ehtiyoj yo‘q.

O‘zbekiston fuqarolari kartaga onlayn tarzda bemalol murojaat qilishlari mumkin. Onlayn ariza berish jarayoni muammosiz. Chunki sayohatchilar Meksika elchixonasiga borishlari yoki uchrashuvni kutishlari shart emas.

Internetda ariza topshirishda quyidagi ba'zi muhim maslahatlar mavjud:

• Kartani olish uchun sayohatchilar anketani aniq to‘ldirishlari kerak.
• Ariza shakli bilan biror hujjatni yuklash shart emas. Biroq hujjatlarni rasmiylashtirish uchun amaldagi pasport kerak.
• Qayta ishlangan Karta elektron pochta orqali murojaat etuvchilarga yuboriladi.

Meksika turistik vizasiga qanday talablar mavjud?

Meksika turistik vizasini olish uchun ariza topshirishda taqdim etadigan hujjatlar quyidagilarni o‘z ichiga oladi:

• Viza uchun ariza to‘ldirishingiz kerak. Agar ariza beruvchi voyaga yetmagan bo‘lsa, ota-onalar yoki qonuniy vakillar arizani imzolashlari kerak.
• Meksikaga kirganingizdan keyin kamida 6 oy davomida amal qiladigan pasport yoki boshqa sayohat hujjatingiz bo‘lishi zarur. Shuningdek, pasportingizning tegishli sahifalari fotonusxasi ham talab qilinadi.
• Hisob raqamingizda so‘nggi 3 oy davomida yashash xarajatlarni qoplash uchun yetarli moliyaviy vositalarni tasdiqlovchi hujjat;
• mehmonxonalar buyurtmasi yoki Meksikada o‘zingiz turgan shaxsning (agar siz do‘stlaringiz / oilangiz bilan qolsangiz) ismi va manzili kabi turar joyni tasdiqlovchi hujjat;
• agar siz ishlasangiz, ish beruvchidan kompaniyadagi mavqeyingiz, yo‘q bo‘lgan vaqtingizda yo‘qligingizga e'tiroz bildirmasliklari to‘g‘risida xat;
• talaba bo‘lsangiz, o‘quv muassasangizdan ro‘yxatdan o‘tganligingizni tasdiqlovchi va kursingiz haqida batafsil ma'lumot beruvchi xat.

Agar ish uchun sayohat qilsangiz yoki sizni tashkilot taklif qilgan bo‘lsa:

• To‘liq ismingiz, kompaniya nomi va ro‘yxatdan o‘tganingiz, Meksikada qanday faoliyat bilan shug‘ullanishingiz va yashash muddati ko‘rsatilgan asl taklifnoma yoki homiylik xati;
• xatni imzolagan shaxs ID nusxasi.

Qisqa muddatli o‘quv kursi uchun borayotgan bo‘lsangiz (180 kundan kam):

• Ta'lim muassasasidan qabul qilish xati;
• o‘qish va yashash xarajatlarini to‘lashingiz mumkinligi haqidagi dalil yoki siz yutgan stipendiya dalillari.

Vaqtinchalik yashash vizasi – Meksikaga 6 oydan ko‘proq, lekin to‘rt yildan kam muddatga ko‘chib o‘tishni istagan chet elliklarga beriladigan viza.

Vaqtinchalik yashash vizasining quyidagi turlari mavjud:

• Meksika talaba vizasi;
• Meksika ish vizasi;
• Meksika oilaviy vizasi.

Meksika talaba vizasi – bu Meksika ta'lim muassasasida o‘qishni davom ettirishni istagan chet ellik talabalarga beriladigan vaqtinchalik yashash vizasining bir turi. Meksikada 180 kundan ko‘proq o‘qishni istagan chet elliklar Meksika talabalik vizasini olishlari shart.

Talaba vizasiga qanday talablar mavjud?

• To‘ldirilgan va imzolangan Meksika vizasi uchun ariza;
• pasportingiz va uning tegishli betlari (birinchi va oxirgi beti, olgan vizalaringiz va shtamplaringiz) nusxalari;
• oxirgi 6 oy ichida olingan, pasport uchun tushiladigan rasm hajmida oq fonli rasm;
• bronlangan parvoz chiptasi (sotib olish shart emas);
• Meksikadagi elchixonaga yuborilgan ta'lim muassasangizdan qabul xati;
• bank hisobingizdan so‘nggi 3 oylik hisobot;
• talaba vizasini rasmiylashtirish uchun to‘lov.

Meksika talabalar vizasi uchun to‘lov taxminan $36ni tashkil qiladi, ammo ariza topshirgan mamlakatingizga qarab u o‘zgarishi mumkin.

Meksika talaba vizasi muddati qancha?

Meksikalik talaba vizasi o‘zi maksimal 180 kun davomida va bitta kirish uchun amal qiladi. Agar siz 180 kundan ko‘proq vaqt qolmoqchi bo‘lsangiz, vaqtinchalik yashash kartasiga murojaat qilishingiz kerak. Vaqtinchalik yashash kartasi dastlab Meksikada bir yil davomida qolish imkoniyatini beradi. Keyin esa o‘qish muddati davomida yangilanishi mumkin. Shuningdek, u sizga mamlakatga bir necha marta kirish va chiqish imkoniyatini beradi.

Visitor Student Visa – bu 180 kundan qisqa muddat mobaynida kursda qatnashadigan talabalar uchun.

Meksika ish vizasi – vizaning bu turi Meksikada pullik ish bilan shug‘ullanishga imkon beradi. Meksikada ishchi vizasini olish uchun ariza beruvchi dastlab ishlash uchun ruxsatnoma olishi kerak.

Meksikada ishlash uchun ruxsatnomasi bo‘lmagan, rezident ruxsatnoma asosida yashovchi kishi ish taklifini olganida, vaqtinchalik yoki doimiy ruxsatnomaga ega bo‘lishlariga qarab turli xil tartib-qoidalarga amal qilishlari kerak.

Agar siz doimiy rezident bo‘lsangiz, immigratsiya to‘g‘risida xabar berishingiz, vaqtinchalik rezident bo‘lsangiz ruxsat so‘rab murojaat qilishingiz kerak.

Sizga Meksikada ish taklif etilsa, ishlash uchun ruxsatnomalar bilan vaqtincha yashash huquqini olishingiz mumkin. Shuni yodda tutingki, ish beruvchi sizning nomingizdan ariza yozishi kerak.

Agar Meksikada bo‘lmasangiz pasportingizda vaqtinchalik yashash vizasi muhrini olish uchun Meksika konsulligiga murojaat qilishingiz kerak. Meksikada bo‘lsangiz, uni yashash kartasi bilan almashtirishingiz zarur bo‘ladi.

Shuningdek, Meksikada vizitor viza asosida bo‘lsangiz (FMM) mamlakatdan chiqib ketishingiz, Meksikadagi chet el konsulligiga borib, vaqtinchalik yashash vizasi muhrini olishingiz kerak bo‘ladi. Meksikaga qaytib kelganingizdan so‘ng uni yashash kartasiga almashtirishingiz zarur.

Meksikada bo‘lsangiz va yashash kartangiz bo‘lsa ish beruvchingiz o‘zgarishi to‘g‘risida xabar berish uchun mahalliy Migratsiya milliy instituti (INN)ga borishingiz shart. Agar sizning kartangizda ishlash imtiyozlari mavjud bo‘lmasa, siz ularga murojaat qilishingiz lozim.

Meksika ish vizasi narxi

Vaqtinchalik yoki doimiy yashash kartasida ishlash uchun ruxsat olish to‘lovlari hajmi quyidagicha:

Siz vaqtinchalik rezident kartasi bilan murojaat qilsangiz, asosiy to‘lov 3 207 MXN (150 AQSh dollari)ni tashkil qiladi. Qo‘shimcha to‘lovlar olinishi mumkin.

Agar doimiy rezident kartasi bo‘lsa, siz ushbu to‘lov uchun javobgar emassiz. Biroq siz ish tartibidagi o‘zgarishlar haqida immigratsiya idorasini xabardor qilishingiz shart.

Meksika oilaviy vizasi – vizaning bu turi Meksikada yashovchi yaqin oila a'zosiga qo‘shilishni istagan chet elliklarga beriladi. Meksikada 180 kundan ko‘proq vaqt davomida oila a'zolariga qo‘shilishni istagan har bir kishi Meksika oilaviy vizasini olish uchun murojaat qiladi. Agar siz faqat 180 kundan qisqa vaqt ichida oilangiz a'zosinikiga borishni niyat qilsangiz, buning o‘rniga sizga Meksika turistik / mehmon vizasi kerak.

Meksika doimiy rezidenti vizasi – bu Meksikada doimiy yashashni istagan chet el fuqarolariga beriladigan viza turi. Ushbu turdagi viza Meksikada mustaqil daromad bilan yashaydigan pensionerlar uchun eng keng tarqalgan, shuning uchun uni Meksika pensiya vizasi deb ham atashadi. Meksikada yaqin oilaviy aloqalari bo‘lgan va Meksikada kamida to‘rt yil vaqtincha yashovchi sifatida yashagan chet elliklar ham Meksikada doimiy yashash huquqiga ega.

6 oydan ko‘proq muddatga Meksikaga ko‘chib o‘tmoqchi bo‘lgan har bir kishi, yashash muddati va maqsadiga qarab, rezident vizasi va rezident kartasiga ega bo‘lishi kerak. Meksikada doimiy yashashni istagan chet elliklar Meksikaning doimiy yashash kartasiga ega bo‘lishlari shart.

Meksika doimiy rezident kartasining afzalliklari

Doimiy rezidentlik kartasi egasiga ovoz berish huquqidan tashqari, haqiqiy Meksika fuqarosiga o‘xshash huquqlarni beradi. Shunday qilib, Meksikaning doimiy yashovchi kartasi bilan:

• Sizga ishlash uchun ruxsatnoma olmasdan ishlashga ruxsat beriladi;
• bepul tibbiy sug‘urtaga murojaat qilishingiz mumkin;
• faqat bir marta murojaat qilishingiz kerak – chunki u muddatsiz, uni har ikki yilda ikki marta yangilashga hojat yo‘q;
• Meksikaga xohlagancha kirishingiz va chiqish imkoniyati bo‘ladi.

Meksikada doimiy yashovchi viza / karta to‘lovlari

Meksika vizasi uchun to‘lov taxminan 36 AQSh dollarini tashkil qiladi, ammo murojaat qilgan davlatingizga qarab u biroz o‘zgarishi mumkin. Kerakli to‘lov usuli ham o‘zgaradi: ba'zi elchixonalar sizdan naqd pul bilan to‘lashingizni so‘rashi mumkin, boshqalari esa bank o‘tkazmasini talab qilishadi.

Bundan tashqari, Milliy Immigratsiya Institutida doimiy rezidentlik kartasini olish uchun ariza topshirganingizda, karta uchun ham to‘lov to‘lashingiz kerak (5000 Meksika pesosi yoki 250 AQSh dollar atrofida).

Mirjalol Abdurasulov tayyorladi.