Kongress Baydenga nisbatan impichment surishtiruvini boshlashga qaror qildi

13 dekabr, chorshanba kuni AQSh Kongressi Vakillar palatasi a’zolari prezident Jo Baydenga nisbatan impichment jarayoni surishtiruvini davom ettirish bo‘yicha rezolyutsiya uchun ovoz berdi. Tegishli qo‘mita tomonidan tayyorlangan hujjatni 221 nafar respublikachi kongressmen qo‘llab-quvvatlagan, 212 nafar demokrat esa qabul qilinishiga qarshi ovoz bergan.

Qaror rasman impichment surishtiruvini boshlaydi. AQSh qonunlariga ko‘ra, surishtiruvning o‘zi ruxsatsiz o‘tkazilishi mumkin, shuning uchun u bir necha oydan beri davom etmoqda. Rezolyutsiya bo‘yicha ovoz berish g‘oyasi spiker Mayk Jonsondan chiqdi, uning fikricha, tasdiqlangan rezolyutsiya impichment jarayoniga ko‘proq hissa qo‘shadi.

Surishtiruv uchun asoslar orasida, xususan, prezidentning o‘g‘li Xanter Baydenning noutbukidan yozishmalar, guvohlarning prezidentning o‘g‘lining biznesiga aloqadorligi haqidagi ko‘rsatmalari, shuningdek, davlat rahbari oilasining shubhali moliyaviy operatsiyalari bor. Bir kun avval kichik Bayden Vakillar palatasining Nazorat qo‘mitasi tomonidan respublikachilarning Jo Baydenning o‘z biznesiga aloqadorligi haqidagi savollariga javob berish uchun chaqirilgan edi. Biroq, u kelmadi.

Vakillar palatasining qaroridan so‘ng, ayblovlar Kongress Senatiga o‘tkaziladi, u yerda protsedura sud jarayoniga aylanadi. Uni Qo‘shma Shtatlar Oliy sudi raisi boshqaradi. Vakillar palatasi sud jarayonida ayblovchi sifatida, senatorlar esa hakamlar hay’ati a’zolari sifatida ishlaydi. Impichment amalga oshirilishi uchun senatorlarning kamida uchdan ikki qismi ovoz berishi kerak. Ammo ayni paytda Senatni demokratlar nazorat qilyapti.