Morgan Stanley 10 йилда биринчи марта Goldman Sachs банкидан ўзиб кетди

Американинг Morgan Stanley банки сўнгги 10 йилда илк бор капиталлашуви бўйича ўзининг асосий рақобатчиси Goldman Sachs банкидан ўзиб кетди. 24 июль кунги савдолар натижасига кўра, Morgan Stanley акциялари 0,26 фоизга қимматлашиб, бир донаси 46,71 долларга баҳоланди. Шу билан унинг капиталлашуви 86,55 млрд долларга етди. 

Американинг бошқа бир молия институти Goldman Sachs акцияси 0,91 фоизга арзонлашиб, бир донаси 218,18 долларгаа баҳоланиб, капиталлашуви 85,06 млрд долларни ташкил этган. Шундай қилиб икки рақобатчи банклар ўртасидаги фарқ 1,49 млрд доллар бўлган. 2009 йили бу рақам Goldman фойдасига 53 млрд доллар бўлгани эътиборга олинса, Morgan Stanley кўрсатган натижани эътироф этиш мумкин. Goldman Sachs 2007 йилда ҳам Morgan Stanley банкидан қиммат турган.
 
2017 йил иккинчи чорак якунларига кўра, Morgan Stanley пул тушуми ва соф даромади Wall-Street экспертларининг тахминларидан илғорлаб кетди. Goldman Sachs натижалари сармоядорларнинг ишончини оқламади.