Покистон Ҳиндистоннинг иккита ҳарбий самолётини уриб туширди

Фото: REUTERS

Покистондан хабар беришларича, Ҳиндистонга тегишли иккита ҳарбий самолёт Покистон ҳаво ҳудудида уриб туширилган.

ТАСС’нинг Покистон қуролли кучлари матбуот котиби генерал-майор Асиф Ғофурга асосан хабар қилишича, «Ҳиндистон ҳарбий-ҳаво кучларининг қирувчи самолётлари мамлакат ҳаво ҳудудини бузиб кирган».

Аниқлик киритилишича, самолёт учувчиларидан бири асирга ҳам олинган.

Ушбу ҳолат бўйича батафсил тафсилотлар ҳозирча йўқ.

Эслатиб ўтамиз, аввалроқ Ҳиндистон ва Покистон ўртасидаги муносабатлар кескинлашаётгани хабар қилинганди.

26 февраль эрталаб Ҳиндистон ҳарбий-ҳаво кучлари Кашмирнинг Покистон қисмидаги “Жайиши Муҳаммад” гуруҳининг йирик машғулот лагерига зарбалар берди. Ҳаво ҳужуми оқибатида кўплаб жангарилар, уларга тегишли транспорт, қурол ва ўқ-дори йўқ қилинган. Ҳиндистон ташқи ишлар вазири биринчи ўринбосари Вижай Гокхале бу зарба зарур бўлгани, чунки гуруҳ Ҳиндистоннинг турли ҳудудларига худкушлар иштирокида ҳужумлар тайёрлаётганини айтган.

#Ҳиндистон #Покистон

14 февраль куни Покистон ҳудудида ўрнашган «Жайш-э-Муҳаммад» террорчи гуруҳи Кашмирда Ҳиндистон армияси ҳарбийлари колоннаси ўтаётган йўлда теракт содир этиши натижасида 46 нафар ҳинд ҳарбийси ҳалок бўлди. Бу воқеа ортидан Покистон ва Ҳиндистон муносабатларида можаро яна авж олди.