ДТМ: Тест синовлари натижалари бўйича ишлар якунланди

Давлат тест марказининг маълум қилишича, абитуриентларнинг тест синовларида тўплаган натижалари бўйича ишлар тугатилган.

Лекин жорий йилда кўплаб имтиёзлар: ҳарбий хизматчиларнинг фарзандлари, ИИВ органи ходимлари фарзандлари, ҳарбий қисм қўмондонлиги тавсияномаси, хотин-қизлар ва Сўх тумани учун ажратилган қўшимча қабул кўрсаткичлари ҳам тест синовлари орқали талабаликка қабул қилинадиган таълим йўналишларига, ҳам касбий (ижодий) имтиҳон орқали қабул қилинадиган таълим йўналишларига татбиқ этилмоқда.

Бундан ташқари, касбий (ижодий) имтиҳонлар 20 сентябргача давом этган ва шу сабабли танлов натижаларини ҳисоблаш ишлари энди якунланмоқда.

«Ҳозир барча ОТМларнинг касбий (ижодий) имтиҳон натижалари ягона базага йиғилмоқда ва бу натижалар тест синовлари натижалари билан бирга ҳисобланмоқда.

Мазкур жараён якунига етгач, абитуриентларнинг талабаликка тавсия этилгани ёки этилмагани бўйича белгиланган тартибда тасдиқланган танлов натижаси Давлат тест марказининг расмий веб-сайтида эълон қилинади», дейилади хабарда.

Эслатиб ўтамиз, кириш имтиҳонлари 2-13 сентябрь куни очиқ майдонларда ўтказилди. ДТМ имтиҳонлар бўйича якуний танлов натижалари 24 сентябрда эълон қилинишини маълум қилган эди. 

Тест натижаларини қандай билиш мумкин?

Абитуриентлар бунинг учун рухсатномасининг пастки ўнг бурчагида QR код остига махсус ҳавола (линк) очиб, тест натижасини кўриши мумкин.

QR кодни қандай ўқиш мумкин?

1) Ҳозирги замонавий смартфонларнинг деярли барчасида QR кодни ўқиш учун телефон камерасининг ўзи кифоя қилади. Алоҳида қанақадир дастур ўрнатиш шарт эмас. Шунчаки телефон камерасини ёқинг ва абитуриент рухсатномасининг пастки қисмидаги QR код устига камерани олиб боринг. Шунда телефон экранида ёзув пайдо бўлади ва abitur.dtm.uz сайтидаги махсус узун ҳавола чиқиб келади. Ўша ҳаволани браузер орқали очсангиз, натижани кўриш мумкин бўлади.

2) Агар мабодо телефонингиз камерасини QR код устига олиб борганингизда экранда ҳеч қандай ўзгариш бўлмаса, унда QR код ўқийдиган махсус илова юклаб олишингиз керак бўлади. Масалан, мана дастурни юклаб олиш мумкин.