Наманган шаҳрига янги ҳоким тайинланди

Анвар Хожахонович Отахўжаев Наманган шаҳар ҳокими этиб тайинланди. Бу ҳақда вилоят ҳокимлиги матбуот хизмати хабар бермоқда.

Анвар Отахўжаев 1972 йилда Наманган шаҳрида туғилган. Маълумоти олий, 1994 ва 2002 йилларда Наманган муҳандислик-иқтисодиёт институти, 2011 йилда президент ҳузуридаги давлат бошқаруви академиясини тамомлаган.

Меҳнат фаолиятини 1994 йилда Наманган шаҳар «Олтин Водий-95» хусусий фирмаси раҳбари вазифасидан бошлаган.
 
1998–2019 йилларда Наманган вилоят Иқтисодиёт ва статистика бошқармаларида турли лавозимларда, Наманган вилояти ҳокимлиги Ахборот-таҳлил гуруҳи бош мутахассиси, Савдо-саноат палатаси Наманган вилоят бошқармаси бошлиғи, Наманган вилояти Меҳнат ва аҳолини ижтимоий муҳофаза қилиш бош бошқармаси бошлиғи, Вазирлар Маҳкамаси Иқтисодиёт ва ташқи иқтисодий алоқалар масалалари йиғма ахборот-таҳлил департаменти ҳудудларни комплекс ривожлантириш шуъбаси етакчи мутахассиси, Озиқ-овқат ҳолдинг компанияси бошқарма бошлиғи ўринбосари, «Ўзпаррандасаноат» уюшмаси раиси ўринбосари, «Олмалиқ кон металлургия комбинати» АЖ бошқарма бошлиғи вазифаларида фаолият юритган. 

У 2019 йилдан шу кунга қадар Чортоқ тумани ҳокими вазифасида ишлаб келаётганди.

• Бундан олдинроқ 2021 йилдан ҳозирги вақтгача Наманган шаҳар ҳокими вазифасида ишлаб келган Ғофур Жамолов Наманган вилояти ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари этиб тайинлангани хабар қилинганди.