Олег Кононенко коинотда жами минг кун ўтказган биринчи космонавт бўлди

Россиялик космонавт Олег Кононенко Ер орбитасида минг кунни ўтказган дунёдаги биринчи одам бўлди. Бу ҳақда «Роскосмос» корпорациясига таяниб ТАСС хабар берди. 

«Бугун «Роскосмос» космонавти Олег Кононенко Халқаро космик станцияда ишлаган ҳолда дунёда биринчи марта космик парвозларининг умумий давомийлиги 1 минг кунга етди», дейилади хабарда. 

Кононенко ўз фаолиятидаги бешинчи космик парвозини амалга оширмоқда. 4 феврал куни у бешта миссия (1998 йилдан 2015 йилгача) давомида жами 878 кун 11 соат 29 дақиқа 48 сония давомида коинотда бўлган россиялик космонавт Геннадий Падалканинг рекордини янгилаган эди. Июн ойида у коинотда ўзининг 60 йиллик юбилейини нишонлайди. Парвози якунига етгач, унинг рекорди 1110 кунни ташкил қилади. 

Олег Кононенко 1964 йил 21 июнда Туркманистоннинг Чоржўй (ҳозирги Туркманобод) шаҳрида туғилган. У 2008 йил апрел ойида «Союз ТМА-12» космик кемасида Халқаро космик станциясига (ХКС) биринчи парвозини амалга оширди. Кононенко Россия ва Туркманистон қаҳрамони унвонига эга.