РФда Danone активлари чеченистонлик собиқ амалдорга ўтди

Чеченистонлик собиқ амалдор Руслан Алисултанов француз озиқ-овқат ишлаб чиқарувчи Danone'нинг Россиядаги собиқ активларига эгалик қилувчи компания ягона эгаси бўлди. Бу ҳақда 9 декабр, душанба куни «Интерфакс» агентлиги Россия Федерацияси давлат реестрига таяниб хабар берди.

Чеченистонлик ёш миллионер

Ҳозир Алисултанов 32 ёшда. 2018 йилда, 26 ёшида у Грозний мэри ўринбосари, кейинроқ — Чеченистон қишлоқ хўжалиги вазири ўринбосари бўлди. Ҳозир у - «Юнимилк» компаниясининг (собиқ «Вамин-Татарстан») ягона эгаси. Бу Россиядаги энг йирик пишлоқ ва сариёғ ишлаб чиқарувчилардан бири. Айнан унга аввалроқ Danone'нинг Россиядаги активлари ўтган. Улар Health & Nutrition фирмасига бирлаштирилди.

Danone компаниясининг Россиядаги активлари «Вамин Р»га сотилгани 2024 йил май ойида маълум бўлди. Келишув суммаси ошкор этилмади. Financial Times ёзганидек, у 17,7 миллиард рублни ташкил қилиши мумкин, бу бизнеснинг бозор қийматидан 56 фоизга паст.

«Татаристонлик Маск»

Битим амалга оширилган вақтда «Вамин Р»нинг 99 фоизи 29 ёшли тадбиркор Минтимер Мингазовнинг «Вамин-Татарстан»компаниясига тегишли эди. У «Единая Россия»дан собиқ сенатор Вагиз Мингазовнинг ўғлидир. «Вамин Р»да фақат 1 фоиз Алисултановга тегишли бўлган. Энди иккинчиси бутун «Вамин-Татарстан»га, шунингдек, «Вамин Р» ҳамда Health & Nutrition'да 100 фоизга эгалик қиляпти. Келишув сабаблари, тафсилотлари ва қиймати номаълум.

Қозоннинг «Бизнес Online» портали компания сотиб олингани ҳақида биринчи бўлиб хабар берди. У Мингазовни «татаристонлик Маск» ва «французлар активларини чеченларга топширган» «Вамин сут империясининг вориси» деб атаган.