Дунёдаги биринчи Fertilo бола туғилди

Gameto компанияси томонидан ишлаб чиқилган янги уруғлантириш технологияси анъанавий ЭКО (Экстракорпорал уруғлантириш) жараёнига нисбатан тезроқ, хавфсизроқ ва арзонроқ алтернативани таклиф этади.

Interesting Engineering нашрининг ёзишича, тухумҳужайранинг етилиши учун гормон инъекцияларига таяниш ўрнига, бу жараёнда инсоннинг илдиз ҳужайраларидан олинган тухумдонни қўллаб-қувватловчи ҳужайралар қўлланилади, улар лаборатория шароитида тухумҳужайранинг етилишига ёрдам беради.

Бу усул тухумҳужайра етилишининг табиий жараёнини тақлид қилади, бу эса жараённи тезроқ ва камроқ инвазив қилади.

1978 йилда ЭКО ёрдамида дунёдаги биринчи чақалоқ туғилгандан бери бу бепуштликдан азият чекаётган жуфтликлар учун кенг тарқалган даволаш усулига айланди. Ваҳоланки, ушбу процедура баъзи муаммоларга эга.

Жараён узоқ, қиммат ва ҳиссий жиҳатдан оғир бўлиши мумкин. Бундан ташқари, тухумдонларнинг оғриқли шишишига олиб келадиган тухумдон гиперстимуляцияси синдроми каби хавфлар билан боғлиқ. Одатда, ЭКО аёлнинг тухумдонларидан етук тухумҳужайрани йиғиш, уларни лабораторияда уруғлантириш ва кейин уруғлантирилган эмбрионларни бачадонга ўтказишни ўз ичига олади. Тухумҳужайра ишлаб чиқаришни рағбатлантириш одатда гормон инъекцияларини талаб қилади, бу ҳар бир даволаш циклида 90 тагача инъекцияни ташкил қилиши мумкин.

Аммо Fertilo 2023 йилги тадқиқотга асосланиб, тухумҳужайра камолотини ва эмбрион шаклланишини сезиларли даражада яхшилайди. Компаниянинг таъкидлашича, ушбу процедура анъанавий ЭКО учун зарур бўлган гормонал инъекцияларнинг 80 фоизини йўқ қилади ва даволаш циклини атиги уч кунгача қисқартиради.

Қайд қилинишича, бу жараён натижасидаги биринчи туғилиш Перунинг Лима шаҳрида содир бўлган.