O‘zbekistonda milliy avtomobillar haqida animatsion film ishlanmoqda

«O‘zbekkino» Milliy agentligi badiiy kengashi tomonidan muallif Ismoil Shomurodovning «Matizning sarguzashtlari» nomli ko‘p qismli multfilm ssenariysi ma'qullandi. Bu haqda agentlik axborot xizmati xabar tarqatdi.

Ushbu animatsion filmning qahramonlari - O‘zbekistonda ishlab chiqariladigan avtomobillardan tashkil topgan bo‘lib, unda bosh qahramon - kichkintoy «Matiz» bilan bog‘liq turli qiziqarli sarguzashtlar hikoya qilinadi. Filmni yaratishda Abdulatif Haydarov boshchiligidagi animatorlar guruhi hamda rassom Zilola Hamidova ijod qilmoqda.

Hozirda multfilmning dastlabki 6 qismi bo‘yicha ishlar boshlab yuborildi. Yil so‘ngiga qadar ushbu yangi multfilmni bolajonlar e'tiboriga taqdim etish rejalashtirilgan.