«O‘zbektelekom» operator va provayderlar uchun narxlar arzonlashishini ma'lum qildi

«O‘zbektelekom» AK bosh direktori o‘rinbosari Alisher Zufarov 2020 yilda mamlakat operatorlari va provayderlariga ko‘rsatiladigan telekommunikatsiya xizmatlari narxlarini pasaytirish bo‘yicha qilingan ishlar haqida ma'lumot berdi.

Uning so‘zlariga ko‘ra, IP-transport xizmatlari bo‘yicha «Ma'lumotlarni uzatish magistral va mulservis tarmoqlarini kengaytirish» loyihasi doirasida joriy yilda transport tarmog‘ining o‘tkazuvchanlik qobiliyati viloyat markazlarigacha 2 barobarga (400 Gbit/s. gacha), tuman markazlarigacha esa 4 barobarga (40 Gbit/s. gacha) oshirilgan.

«Mazkur loyiha bo‘yicha ishlarning asosiy qismi yakunlangani munosabati bilan 2021 yil 1 yanvardan transport kanallarini ijaraga berish xizmati joriy narxi 2 barobarga arzonlashtirilmoqda.

Transport tarmog‘i o‘tkazuvchanlik qobiliyatini kengaytirish va narxlarini arzonlashtirish operator va provayderlarning respublikamizning chekka hududlarida faoliyatini rivojlantirish uchun shart-sharoitlar yaratadi», – dedi Alisher Zufarov.

Ta'kidlanishicha, 2020 yil noyabr oyidan operator va provayderlarga xalqaro paketli kommutatsiya markazi (XPKM) orqali taqdim etiladigan 1 Mbit/s tezlikdagi kanal narxi oldingi tariflarga nisbatan 20 foizga arzonlashtirilib, 45 022 so‘m deb belgilangan.

2021 yil 1 yanvardan boshlab mazkur xizmat narxi 40 000 so‘mgacha arzonlashtirilishi rejalashtirilmoqda.