Katta Farg‘ona kanaliga voyaga yetmagan yana bir bola cho‘kib ketdi

Farg‘ona viloyatining O‘zbekiston tumanida joylashgan «O‘rta» MFY, Tosh qishlog‘i hududidan oqib o‘tgan Katta Farg‘ona kanaliga 25 aprel kuni voyaga yetmagan, 2-sinf o‘quvchisi Abdurahim ismli yigitcha cho‘kib ketgan.  

Kun.uz’ga xabar bergan Ravshanjon Shomatovning aytishicha, kanalga cho‘kib ketgan Abdurahimning jasadi oradan to‘qqiz kun o‘tib, ya'ni 4 may kuni soat 16:30 larda, cho‘kib ketgan joydan 5 km uzoqlikda topilgan. 

«Mas'ul idoralar, ichki ishlar xodimlari, ko‘pchilik bo‘lib izladik. Afsuski, topa olmadik. Qarangki, seshanba kuni suvning o‘zi jiyanim tanasini suv yuziga olib chiqib qo‘ydi. Cho‘kib ketgan joyidan 5 km uzoqlikdan chiqdi. O‘sha atrofda yurgan suvchilar ko‘rib qolibdi», — deydi Kun.uz muxbiri bilan suhbatlashgan R.Shomatov. 

Ta'kidlanishicha, marhum bolakay Abdurahim sakkiz yoshda bo‘lib, 2-sinf o‘quvchisi bo‘lgan.  

Farg‘ona viloyati Favqulodda vaziyatlar boshqarmasi axborot xizmati bilan bog‘lanishning imkoni bo‘lmagan. Shu sababli voqeaning asl sabablari hozircha noma'lum.

Kun.uz marhumning oila a'zolari va yaqinlariga sabr tilaydi.