Катта Фарғона каналига вояга етмаган яна бир бола чўкиб кетди

Фарғона вилоятининг Ўзбекистон туманида жойлашган «Ўрта» МФЙ, Тош қишлоғи ҳудудидан оқиб ўтган Катта Фарғона каналига 25 апрел куни вояга етмаган, 2-синф ўқувчиси Абдураҳим исмли йигитча чўкиб кетган.  

Kun.uz’га хабар берган Равшанжон Шоматовнинг айтишича, каналга чўкиб кетган Абдураҳимнинг жасади орадан тўққиз кун ўтиб, яъни 4 май куни соат 16:30 ларда, чўкиб кетган жойдан 5 км узоқликда топилган. 

«Масъул идоралар, ички ишлар ходимлари, кўпчилик бўлиб изладик. Афсуски, топа олмадик. Қарангки, сешанба куни сувнинг ўзи жияним танасини сув юзига олиб чиқиб қўйди. Чўкиб кетган жойидан 5 км узоқликдан чиқди. Ўша атрофда юрган сувчилар кўриб қолибди», — дейди Kun.uz мухбири билан суҳбатлашган Р.Шоматов. 

Таъкидланишича, марҳум болакай Абдураҳим саккиз ёшда бўлиб, 2-синф ўқувчиси бўлган.  

Фарғона вилояти Фавқулодда вазиятлар бошқармаси ахборот хизмати билан боғланишнинг имкони бўлмаган. Шу сабабли воқеанинг асл сабаблари ҳозирча номаълум.

Kun.uz марҳумнинг оила аъзолари ва яқинларига сабр тилайди.